Prokuroria kërkon paraburgim për inspektoren e AUV-së, dyshohet se mori 250 euro ryshfet nga një kompani

Prokuroria Themelore Publike në Shkup ka nisur procedurë hetimore ndaj një inspektoreje 42-vjeçare të Agjencisë së Ushqimit dhe Veterinarisë (AUV), e dyshuar për veprën penale “Marrje ryshfeti”, sipas nenit 357, paragrafi 1 të Kodit Penal.

Sipas Prokurorisë, gjatë periudhës 17–25 shtator, inspektorja e ushqimit ka kërkuar dhe pranuar 250 euro nga drejtuesi i një personi juridik. Në këmbim, ajo duhej të hartonte një procesverbal ku të shënonte se kishte kryer mbikëqyrje inspektuese dhe se në objekt nuk ishin konstatuar parregullsi, përkatësisht se ishin respektuar të gjitha procedurat e nevojshme për punë.

Prokurori publik i ka propozuar gjyqtarit të procedurës paraprake caktimin e paraburgimit. Prokuroria e arsyeton kërkesën me rrezikun e arratisjes, mundësinë që e dyshuara të ndikojë te i dëmtuari dhe në dëshminë e tij, si dhe me rrezikun që, duke shfrytëzuar pozitën e inspektores, të përsërisë veprën për të cilën dyshohet.