Prokuroria heton vërtetësinë e raporteve të ujit në Gostivar, nuk përjashton zgjerimin e hetimeve

Prokuroria po heton një pistë të re lidhur me rregullsinë e analizave të ujit në Gostivar, të kryera nga Qendra për Shëndet Publik në Gostivar dhe Instituti për Shëndet Publik. Pyetja kyçe mbetet pse ndotja nuk u zbulua me kohë përmes këtyre kontrolleve.

Gjatë një takimi me mediat, prokurorët sqaruan se në këtë fazë nuk mund të pohojnë nëse raportet e dorëzuara më parë mbi cilësinë e ujit ishin të sakta apo të manipuluara, pasi hetimet janë ende duke u zhvilluar.

Për të hedhur dritë mbi këtë çështje, do të urdhërohen ekspertiza plotësuese që analizojnë metodën e marrjes dhe testimit të mostrave. Po ashtu, do të kalojnë në sitë të gjitha kontrollet e ujit të realizuara gjatë vitit aktual dhe atij të shkuar. Në rast se zbulohen shkelje apo përgjegjësi të subjekteve të tjera, hetimi do të shtrihet edhe mbi ta.

Nga ana tjetër, Agjencia e Ushqimit dhe Veterinarisë bëri të ditur se mostrat e analizuara nga Qendra për Shëndet Publik në Gostivar më 29 qershor dhe 13 korrik e cilësonin ujin të pijshëm. Ironia qëndron në faktin se mu më 13 korrik nisi shtimi i rasteve të pacientëve me shqetësime gastrointestinale.