Categories: maqedoni

Policia në Tetovë nis hetimet për përleshjet mes grupeve të të rinjve

Sektori i Punëve të Brendshme në Tetovë ka filluar hetimet për të sqaruar rastin e dhunës mes dy grupeve të të rinjve, i cili u raportua në media pasi përplasjet ndodhën dy herë brenda pak ditësh. SPB Tetovë njofton se po shqyrtohen edhe regjistrimet e kamerave të sigurisë në qytet, me synimin që të identifikohen autorët e dhunës së ndodhur dy net më parë.

Të lidhura

None found

Zëdhënësi i SPB Tetovë, Fatmir Rexhepi, deklaroi se pjesëtarët e policisë po ndërmarrin të gjitha veprimet e nevojshme, duke u mbështetur edhe te informacionet e qytetarëve, për të përcaktuar identitetin e personave të përfshirë. Ai bëri të ditur se për biseda informative janë ftuar edhe drejtues të dy grupeve të tifozëve të skuadrave tetovare të futbollit, në përpjekje për të parandaluar përsëritjen e rasteve të tilla dhe përshkallëzimin e situatës.

Rexhepi shprehu shpresën se do të ketë mirëkuptim, ndërsa u bëri thirrje qytetarëve që të kujdesen për fëmijët e tyre. Sipas tij, dihet se të miturit shpesh keqpërdoren në ngjarje të këtilla, të cilat janë shfaqur kohët e fundit.

Pas ngritjes së alarmit për situatën, Policia e Tetovës ka shtuar praninë e efektivëve me uniformë gjatë mbrëmjes së kaluar dhe ditës së sotme. Patrullimet janë përqendruar në zonat kryesore të qytetit ku zakonisht regjistrohen përplasjet, veçanërisht në orët e mbrëmjes, me qëllim mbledhjen e informacioneve dhe pengimin e rrahjeve mes të rinjve që dyshohet se u përkasin grupeve të “vojvodëve” dhe “Ballistëve”.

Sipas Fatmir Rexhepit, shtimi i pranisë policore synon para së gjithash sigurimin e sa më shumë të dhënave për ngjarjen, në mënyrë që të mos fajësohen persona që nuk kanë qenë të përfshirë. Gjithashtu, po punohet për identifikimin e të miturve që ndodheshin atë natë në vendngjarje, të cilët do të ftohen në stacion bashkë me prindërit e tyre. Masat do të ndërmerren në bashkëpunim me Qendrën për Punë dhe Politikë Sociale, me synimin që raste të tilla të mos përsëriten në rajonin që mbulohet nga SPB Tetovë.

Ndërkaq, sipas informacioneve të televizionit Alsat, gjatë javës grupe të rinjsh janë përleshur në dy net radhazi. Dyshohet se në këto rrahje janë përdorur edhe mjete të forta dhe të mprehta, ndërsa tre persona kanë mbetur të lënduar./Alsat/