PLD: Krizë në drejtësi, 18 gjykata joefikase dhe mbi 134.000 çështje të pazgjidhura

Partia Liberal-Demokratike (PLD) ka shprehur shqetësim për gjendjen e drejtësisë në Maqedoninë e Veriut, duke ia atribuar vështirësitë financimit të pamjaftueshëm, mungesës së personelit dhe ndikimit politik. Në reagimin e saj, PLD-ja i referohet Raportit të njëmbëdhjetë në hije për Kapitullin 23, hartuar nga Instituti për Politikë Evropiane (EPI).

Sipas partisë, nga 34 gjykata gjithsej, 18 nuk funksionojnë me efikasitet. Po ashtu, mbi 134.000 lëndë mbeten të pazgjidhura dhe disa prokurori punojnë pa asnjë prokuror publik.

PLD-ja vë në dukje se për pushtetin gjyqësor ndahen 0,26 për qind e Prodhimit të Brendshëm Bruto (PBB), ndonëse ligji parashikon 0,8 për qind. Partia përmend gjithashtu anulimin e konkursit për pranimin e 130 kandidatëve në Akademinë për Gjykatës dhe Prokurorë Publikë, pasi Ministria e Financave nuk kishte siguruar fondet e nevojshme.

Një tjetër shqetësim që ngre partia është presioni i pushtetit ekzekutiv ndaj Prokurorisë Publike. Sipas PLD-së, ai shfaqet përmes deklaratave publike të zyrtarëve të lartë qeveritarë për hetime dhe procedura të caktuara gjyqësore.

Në reagimin e partisë thuhet se pushteti nuk mund të kërkojë rezultate nga prokuroria, ndërkohë që i komenton dhe i kundërshton politikisht vendimet e saj. PLD-ja thekson se nuk mund të mbrohet sundimi i ligjit duke krijuar një klimë ku prokurorët, përpara se të vendosin profesionalisht, shqetësohen për reagimin politik.

Sipas PLD-së, mungesa e personelit dhe e financimit, si dhe ndryshimet në Kodin Penal që kanë lejuar parashkrimin e çështjeve të korrupsionit të nivelit të lartë, po krijojnë një situatë ku pandëshkueshmëria kthehet në rregull dhe drejtësia në përjashtim.

Kryetarja e PLD-së, Monika Zajkova, thotë se kriza nuk lidhet vetëm me mungesën e parave, por edhe me zgjedhjet e prioriteteve politike. Ajo thekson se pushteti gjen mjete për funksionarët, por jo për drejtësinë.

PLD-ja kërkon që të sigurohen pa vonesë fondet e përcaktuara me ligj për sistemin e drejtësisë dhe të rifillojë pranimi i gjykatësve e prokurorëve të rinj publikë. Partia kërkon gjithashtu shkurtimin e shpenzimeve të panevojshme administrative dhe kalimin e mjeteve buxhetore te institucionet përgjegjëse për garantimin e sigurisë juridike të qytetarëve.