Pezullohet vendimi i UNESCO-s për përfshirjen e Rajonit të Ohrit në listën e rrezikut, shteti ka afat pesë vjet për masat mbrojtëse

Rajoni i Ohrit nuk do të përfshihet në Listën e Trashëgimisë Botërore në Rrezik, pas një rezolute të Komitetit të Trashëgimisë Botërore të UNESCO-s. Ky vendim e mban zonën të regjistruar si një pasuri kulturore dhe natyrore me rëndësi universale, duke i dhënë mundësi shtetit që të përmirësojë standardet e ruajtjes.

Vendimi shoqërohet me një afat shtesë prej pesë vitesh, gjatë të cilit pritet zbatimi i plotë i direktivave për mbrojtjen e trashëgimisë natyrore dhe kulturore të kësaj zone.

Në emër të shtetit, ambasadori Igor Nikolov, i cili drejtonte delegacionin në këtë forum, siguroi se ekziston një angazhim i plotë për të ndjekur udhëzimet dhe për të garantuar integritetin e vlerave të jashtëzakonshme të Rajonit të Ohrit.

Nikolov e cilësoi rezolutën si një shenjë besimi ndaj përpjekjeve të bëra deri tani, por edhe si një thirrje për veprime të mëtejshme konkrete. Ai përmendi si prioritare forcimin e mekanizmave institucionalë, adresimin e problematikës së ndërtimeve pa leje, si dhe masat për konservimin dhe restaurimin e Studençishko Blatos. Një aspekt tjetër i rëndësishëm, theksoi ai, mbetet bashkërendimi i veprimeve me Shqipërinë për administrimin e kësaj pasurie ndërkufitare.