Pasaporta e Maqedonisë së Veriut renditet e 38-ta, qytetarët mund të udhëtojnë në 130 destinacione

Dokumenti i udhëtimit i Maqedonisë së Veriut është pozicionuar në vendin e 38-të në klasifikimin global “Henley Passport Index”. Sipas këtij vlerësimi, shtetasit e RMV-së mund të udhëtojnë pa vizë ose të pajisen me vizë pas mbërritjes në rreth 130 vende të botës.

Avantazhin më të madh në lëvizje e kanë në Evropë, ku përfshihen edhe të gjitha shtetet pjesë e zonës Shengen. Megjithatë, për të hyrë në SHBA, Kanada, Australi dhe në disa shtete të Azisë, qytetarët duhet të sigurojnë paraprakisht vizën përkatëse.

Në krahasim me shtetet e tjera të Ballkanit Perëndimor, Serbia ka një pozicion më të favorshëm, pasi renditet e 34-ta dhe ofron qasje në 136 destinacione.

Maqedonia e Veriut ndan vendin e 38-të me Malin e Zi, pasaporta e të cilit mundëson hyrjen në 128 deri në 130 vende. Më poshtë renditen Bosnja dhe Hercegovina dhe Shqipëria, të cilat ndodhen rreth vendit të 43-të, ndërsa Kosova është në vendin e 61-të.

Lëvizshmëri shumë më të gjerë kanë qytetarët e vendeve fqinje që janë anëtare të Bashkimit Evropian. Pasaporta e Bullgarisë mundëson udhëtimin pa pengesa në mbi 175 shtete dhe renditet ndër 15 dokumentet më të fuqishme në botë. Ndërkohë, pasaporta greke pozicionohet në krye, mes pesë pasaportave më të forta globale për udhëtime./Telegrafi/