Parlamenti Studentor i UEJL-së ridërgon kërkesën për zhvillimin e provimeve shtetërore edhe në gjuhën shqipe

Parlamenti Studentor i Universitetit të Evropës Juglindore (UEJL) i është drejtuar sërish Ministrisë së Drejtësisë, duke dorëzuar një kërkesë zyrtare për zhvillimin e Provimit të Jurisprudencës dhe provimeve të tjera profesionale edhe në gjuhën shqipe.

Kërkesa i është dorëzuar ministrit të ri të Drejtësisë. Studentët shprehen se presin që ai ta vendosë këtë çështje ndër prioritetet e tij dhe të ndërmarrë masa konkrete për zgjidhjen e saj.

“Në emër të Parlamentit Studentor të Universitetit të Evropës Juglindore, sot i dorëzova ministrit të ri të Drejtësisë kërkesën që Provimi i Jurisprudencës dhe provimet e tjera profesionale të mund të zhvillohen edhe në gjuhën shqipe. Me marrjen e detyrës së re, shpresojmë që ministri t’i kushtojë vëmendjen e nevojshme kësaj çështjeje dhe të ndërmarrë hapa konkretë për një zgjidhje të drejtë”, thuhet në reagimin e studentëve.

Studentët rikujtojnë se prej fillimit kanë mbajtur të njëjtin qëndrim, duke kërkuar mundësi të barabarta për të gjithë dhe zbatimin e plotë të të drejtave gjuhësore.

“Kjo çështje nuk ka karakter politik. Ajo lidhet me barazinë, respektimin e ligjit dhe, para së gjithash, të drejtat e studentëve”, theksohet në njoftim.