Osmani kundërpërgjigjet ndaj VLEN-it: Diplomacia nuk barazohet me zgjedhjet politike

Bujar Osmani, ish-ministër i Punëve të Jashtme, iu është përgjigjur pretendimeve të koalicionit VLEN për takimin e tij zyrtar me presidentin serb Aleksandar Vuçiq, të zhvilluar në kohën kur ai udhëhiqte diplomacinë e Maqedonisë së Veriut.

Reagimi i tij pason publikimin nga VLEN, më herët gjatë ditës, të një komunikate të Presidencës së Serbisë. Koalicioni e akuzoi ish-ministrin se gjatë mandatit të tij janë trajtuar çështje që, sipas VLEN-it, nuk kanë qenë në interes të shqiptarëve.

Osmani vlerëson se komunikata në fjalë është deklaratë e Presidencës së Serbisë dhe se ajo shpreh pozicionet e Beogradit, jo qëndrimet e institucioneve të Maqedonisë së Veriut.

Sipas tij, VLEN po tenton t’i interpretojë kontaktet zyrtare diplomatike si orientime politike, ndërkohë që, siç thotë Osmani, lë në hije faktin se është pjesë e një qeverie me partnerë të cilët, sipas pretendimit të tij, mohojnë pavarësinë e Kosovës, relativizojnë gjenocidin në Srebrenicë dhe Marrëveshjen e Ohrit.

“Sot duhet të jenë vërtet të dëshpëruar në VLEN nëse takimet zyrtare të një ministri të Jashtëm i paraqesin si përcaktime politike, ndërsa bashkëqeverisjen e tyre e konsiderojnë normalitet”, shkruan Osmani.

Ai nënvizon se komunikimi me udhëheqës të vendeve me të cilat ekzistojnë mosmarrëveshje përbën praktikë të zakonshme në diplomacinë ndërkombëtare. Si ilustrim, Osmani përmend dialogun Kosovë-Serbi dhe takimet e liderëve ndërkombëtarë me homologë nga shtete që mbajnë qëndrime të kundërta.

Për Osmanin, ministri i Jashtëm ka për detyrë të mbrojë interesin shtetëror përmes dialogut, ndërsa formimi i koalicioneve në qeveri përfaqëson një vendim politik.

“Takimet diplomatike janë detyrim kushtetues. Bashkëqeverisja është zgjedhje politike. Këto janë dy gjëra krejtësisht të ndryshme”, thekson ai.

Në përmbyllje, Osmani deklaron se, në cilësinë e ministrit të Jashtëm, do të vazhdonte të takohej me secilin homolog si pjesë e përgjegjësisë së tij. Megjithatë, sipas tij, nuk do të pranonte bashkëqeverisje me subjekte politike që mohojnë pavarësinë e Kosovës, relativizojnë gjenocidin në Srebrenicë ose cenojnë të drejtat e shqiptarëve.