Osmani i kthen përgjigje VLEN-it: Takimet diplomatike s’janë zgjedhje politike

Bujar Osmani, i cili më parë mbante postin e ministrit të Punëve të Jashtme, ka hedhur poshtë kritikat e koalicionit VLEN në lidhje me takimin e tij institucional me presidentin serb, Aleksandar Vuçiq, në periudhën kur ai drejtonte diplomacinë e Maqedonisë së Veriut.

Në përgjigjen e tij, Osmani thekson se VLEN po mundohet t’i shndërrojë takimet e rregullta diplomatike në qëndrime politike, duke injoruar, sipas tij, që vetë është pjesë e një ekzekutivi ku partnerët mohojnë shtetësinë e Kosovës, minimizojnë masakrën e Srebrenicës dhe Marrëveshjen e Ohrit.

“Të jesh sot në VLEN do të thotë të jesh vërtet i pashpresë, nëse takimet zyrtare të një shefi të diplomacisë i interpreton si orientime politike, ndërkohë që e quan normale bashkëqeverisjen me të tjerët”, shkroi Osmani.

Ai nënvizoi se bisedimet me krerët e vendeve me të cilët ka kontradikta janë rutinë e marrëdhënieve ndërkombëtare, duke sjellë si ilustrim dialogun Kosovë-Serbi dhe takimet e liderëve globalë me homologë nga shtete me pozicione të kundërta.

Sipas ish-ministrit, roli i një ministri të Jashtëm është të mbrojë interesat kombëtare përmes kanaleve të dialogut, ndërsa formimi i aleancave qeveritare është një vendim thjesht politik.

“Takimet diplomatike janë një obligim kushtetues. Bashkëqeverisja është një preferencë politike. Këto janë dy sfera krejtësisht të ndara”, theksoi ai.

Duke iu referuar njoftimit të shpërndarë nga VLEN, Osmani sqaroi se ai dokument është një komunikatë e Presidencës serbe, e cila, sipas tij, reflekton pikëpamjet e Beogradit dhe jo ato të institucioneve të Maqedonisë së Veriut.

Në mbyllje të reagimit, Osmani pohoi se do të vijonte të zhvillonte takime me çdo homolog në funksion të detyrës së ministrit të Jashtëm, por nuk do të pranonte kurrë të bashkëqeveriste me forca që mohojnë pavarësinë e Kosovës, minimizojnë gjenocidin në Srebrenicë ose cenojnë të drejtat e shqiptarëve.

Përgjigjja e Osmanit erdhi pasi më herët gjatë ditës, VLEN bëri publike një komunikatë të Presidencës së Serbisë, duke e akuzuar ish-ministrin se gjatë mandatit të tij kishin dalë në dritë biseda për çështje që, sipas këtij koalicioni, nuk ishin në dobi të shqiptarëve.