Orhan Murtezani nis mandatin si Ambasador dhe Përfaqësues i Përhershëm i Maqedonisë së Veriut në NATO

Orhan Murtezani ka filluar sot detyrën e Ambasadorit dhe Përfaqësuesit të Përhershëm të Republikës së Maqedonisë së Veriut pranë NATO-s.

Përmes një reagimi publik, ai e cilësoi këtë detyrë si një etapë të re në karrierën e tij, por edhe si vijim të angazhimit për forcimin e rolit të vendit në kuadër të familjes euroatlantike.

“Detyrë e re, përgjegjësi e njëjtë”, shkroi Murtezani, duke nënvizuar se objektivi i tij është që Maqedonia e Veriut të mbetet një shtet i sigurt, aleat i besueshëm dhe vend me zë e kontribut të veçantë në NATO.

Ai vuri në dukje se, në një periudhë kur siguria nuk mund të konsiderohet e garantuar, anëtarësimi në NATO nënkupton jo vetëm privilegje, por edhe përgjegjësi.

Murtezani theksoi se kjo përbën për të një kapitull të ri profesional, ndërsa përkushtimi mbetet i njëjtë: Maqedonia e Veriut të jetë e sigurt, partnere e besueshme dhe një shtet aktiv në familjen euroatlantike.