Nikollovski: Largimi i Tripunovskit përbën fitore për bujqit

Deputeti i LSDM-së, Ljupço Nikollovski, e cilëson largimin e ministrit Cvetan Tripunovski si një fitore për bujqit. Në njoftimin e tij, ai vlerëson se po largohet personi që, sipas tij, për dy vjet e solli bujqësinë e vendit në prag të humnerës.

Sipas Nikollovskit, Tripunovski bëri premtime të mëdha, por në vend të tyre prodhoi kaos dhe një sërë skandalesh korruptive. Ai shton se po largohet ministri që, sipas tij, i la bujqit pa subvencione të paguara, pa sistem aplikimi, me programe të anuluara, me thirrje të anuluara për modernizimin e bujqësisë dhe me çmime të mjerueshme blerjeje.

Ai thekson se, për disa shumë herët e për disa shumë vonë, ka përfunduar mandati i një njeriu që, në vend se të angazhohej për përmirësimin e kushteve të punës dhe mirëqenies së bujkut, u mor me revanshizëm partiak, mobing dhe eliminimin e të gjithë palëve të interesuara që nuk iu bindën politikave të tij katastrofike.

Nikollovski shkruan se, fatkeqësisht, problemet në bujqësi nuk largohen bashkë me të, por përkundrazi po shtohen nga dita në ditë. Ai nënvizon se beteja për të ndalur trendet negative që po e dëmtojnë sektorin bujqësor do të vazhdojë edhe në ditët në vijim, kur në rend dite në Kuvend do të jetë ribalancimi i buxhetit.