Nikolloski: Marrëveshje me Kroacinë, Zvicrën dhe Rumaninë për transportuesit nga Maqedonia

Qeveria dhe Ministria e Transportit po vijojnë përpjekjet për të adresuar vështirësitë që u janë krijuar transportuesve nga Maqedonia pas zbatimit të sistemit “EES” (Entry/Exit System) në Bashkimin Evropian. Këtë e deklaroi sot zëvendëskryeministri dhe ministri i Transportit, Aleksandar Nikolloski.

Nikolloski sqaroi se kjo çështje është përgjegjësi e Bashkimit Evropian dhe e zonës Shengen. Megjithatë, sipas tij, shteti po vepron për të kapërcyer pasojat, duke lidhur marrëveshje dypalëshe me vende të caktuara.

Ai bëri të ditur se Maqedonia tashmë ka arritur marrëveshje të tilla me Kroacinë, Zvicrën dhe Rumaninë. Ndërkohë, po zhvillohet punë intensive për të siguruar marrëveshje edhe me Austrinë, Hungarinë dhe Gjermaninë.

Duke iu referuar paralajmërimeve të disa transportuesve për protesta të mundshme nëse nuk arrihet një zgjidhje deri më 1 shtator, Nikolloski deklaroi se Qeveria mban kontakte të vazhdueshme me shoqatat e transportuesve. Ai theksoi se zgjidhje konkrete po kërkohen përmes bashkëpunimit bilateral me shtetet e zonës Shengen, ndërsa protestën e cilësoi si zgjidhje politike të një vendi fqinj.

“Takimet tona zhvillohen rregullisht, çdo javë ose, më së shumti, çdo dy javë. Bashkëpunimi është i shkëlqyer. Kjo është vetëm një nga qindra çështjet për të cilat po gjejmë zgjidhje. Për problemin e shkaktuar nga vendosja e sistemit ‘Entry/Exit’ të Bashkimit Evropian, po angazhohemi maksimalisht dhe transportuesit gëzojnë mbështetjen tonë të plotë”, deklaroi Nikolloski.