Nga 1 tetori, paga më të larta për kryetarin dhe gjyqtarët e Gjykatës Kushtetuese në Maqedoni

Kryetari dhe gjyqtarët e Gjykatës Kushtetuese të Republikës së Maqedonisë së Veriut, duke nisur nga 1 tetori i këtij viti, do të përfitojnë paga më të larta krahasuar me ato që parashikohen aktualisht nga Ligji për Pagat dhe Shpërblimet e Tjera të Personave të Zgjedhur dhe të Emëruar në Shtet, shkruan “360 gradë”.

Kjo vjen pasi të mërkurën Gjykata Kushtetuese shfuqizoi ndryshimet e shkurtit 2026, por vetëm në pjesën që ka të bëjë me koeficientin e Kryetarit të Gjykatës Kushtetuese dhe të gjyqtarëve të saj. Si rrjedhojë, pagat e tyre do të përllogariten sipas dispozitave ligjore të vitit 2024, kur koeficientët ishin më të lartë, përcjell Telegrafi Maqedoni.

Në thelb, ky është epilogu i vendimit të gjyqtarëve kushtetues për të rrëzuar ndryshimet në Ligj nga shkurti i këtij viti që zbatoheshin për ta dhe që kishin ulur koeficientët për llogaritjen e pagave të të gjithë zyrtarëve.

Vendimi është marrë në seancën e mbajtur më 17 qershor. Kjo çështje nuk tërhoqi vëmendje të madhe publike, pjesërisht për shkak se në të njëjtën seancë u shfuqizua edhe riemërtimi i rrugëve dhe shesheve në Tetovë nga viti 2007, çka nënkupton rikthimin e emrave të vjetër.

Gjithsesi, vendimi për shfuqizimin e pjesëve të dy neneve të Ligjit për Pagat dhe Shpërblimet e Tjera të Personave të Zgjedhur dhe të Emëruar, së bashku me arsyetimin e plotë, është publikuar në faqen zyrtare të Gjykatës Kushtetuese.