MPB: 55 masa në Shtip, 35 motoçiklistë u gjobitën për mungesë helmete

Ministria e Brendshme njoftoi se kontrollet në trafik do të vijojnë edhe në periudhën e ardhshme, ndërsa ndaj të gjithë personave që kanë kryer vepra penale do të parashtrohen kallëzimet përkatëse. Po ashtu, u bë thirrje për të gjithë pjesëmarrësit në komunikacion që të zbatojnë vazhdimisht rregullat dhe dispozitat, me synim rritjen e sigurisë në rrugë.

Gjatë një aksioni kontrolli të zhvilluar më 4 korrik, nga ora 17:00 deri në 23:00, në rajonin e Shtipit, efektivët e policisë nga Njësia Mobile për Siguri në Trafik në kuadër të Sektorit për Çështje Trafikale shqiptuan gjithsej 55 sanksione për kundërvajtje dhe vepra penale.

Kontrolli ishte fokusuar te drejtuesit e mopedëve, motoçikletave, kuadriçikletave dhe skuterëve elektrikë që nuk kishin respektuar rregullat e trafikut.

Nga numri i përgjithshëm i masave të vendosura, pjesa më e madhe, konkretisht 35, i përket rasteve të ngasjes së motoçikletës pa helmetë mbrojtëse. Përveç kësaj, u shqiptua një masë për drejtim automjeti nën ndikimin e alkoolit, një tjetër për leje drejtimi të skaduar dhe tre masa për mungesë të shfaqjes së targës.

Aksioni evidentoi edhe gjashtë vepra penale për “drejtim të pakujdesshëm të automjetit”, sipas nenit 297-a të Kodit Penal. Për këto raste, gjashtë persona, mes tyre edhe një i mitur, u privuan nga liria.

Policia konfiskoi gjithashtu një motoçikletë, pasi leja e saj kishte skaduar për më shumë se gjashtë muaj.