Mimoza Musa takon sekretarin shtetëror spanjoll për BE-në: Përkrahja e Spanjës ka peshë në avancimin evropian të Maqedonisë së Veriut

Mimoza Musa, deputete e VLEN-it dhe anëtare e Komisionit për Çështje Evropiane në Kuvendin e Maqedonisë së Veriut, është takuar me sekretarin shtetëror për Bashkimin Evropian të Mbretërisë së Spanjës, Fernando Mariano Sampedro Markos.

Musa njoftoi se, në cilësinë e deputetes dhe anëtares së Komisionit për Çështje Evropiane, mori pjesë në takimin e zhvilluar me Fernando Mariano Sampedro Markos.

Në fokus të bisedimeve ishin e ardhmja evropiane e vendit, zgjerimi i Bashkimit Evropian dhe nevoja për të shfrytëzuar rrethanat e tanishme, me qëllim arritjen e përparimit të mëtejshëm në integrimin evropian.

Deputetja e VLEN-it shprehu vlerësim të veçantë për mbështetjen e pandërprerë që Spanja i ka dhënë perspektivës evropiane të Maqedonisë së Veriut. Sipas saj, si një shtet anëtar me ndikim brenda BE-së, Spanja mund të ketë një rol domethënës në çuarjen përpara të rrugëtimit drejt anëtarësimit të plotë në familjen evropiane.

Ajo theksoi gjithashtu se zgjerimi i Bashkimit Evropian u sjell dobi të gjitha palëve, ndërsa e ardhmja e kontinentit lidhet me një Evropë më të bashkuar, më të fuqishme dhe të mbështetur mbi vlera të përbashkëta.

Sipas njoftimit të Musës, takimi krijoi hapësirë për forcimin e dialogut dhe të bashkëpunimit mes Maqedonisë së Veriut dhe Spanjës, nëpërmjet shkëmbimit të përvojave dhe praktikave të mira.