Mickoski: Takimet në Gjermani në funksion të investimeve të reja dhe rritjes së PBB-së

Thellimi i lidhjeve ekonomike me Gjermaninë, tërheqja e më shumë investimeve dhe rritja e PBB-së janë synimet që kryeministri Hristijan Mickoski theksoi sonte në një videomesazh. Ai bëri të ditur se gjatë ditës së sotme, në kuadër të vizitës në Gjermani, bashkë me ekipin qeveritar zhvilloi një sërë takimesh dhe aktivitetesh afariste.

Programi në Bon nisi me takime në “Dojçe Telekom”, kompani që operon prej disa dekadash edhe në tregun e Maqedonisë. Mickoski e cilësoi agjendën e ditës mjaft dinamike dhe vërtet të suksesshme.

Në bisedën me drejtorin kryesor të “Dojçe Telekom”, në qendër të vëmendjes ishin mundësitë për investime shtesë në Maqedoni. Sipas kryeministrit, diskutimi nuk u ndal vetëm te telekomunikacioni, por përfshiu edhe shëndetësinë, teknologjinë inteligjente dhe industri të tjera. Ai tha se investimet në këto fusha do t’i sillnin ekonomisë së Maqedonisë vlerë të madhe të shtuar, duke zgjeruar njëkohësisht praninë e kompanisë si në vend, ashtu edhe në rajon.

Pjesë e vizitës në Bon ishin edhe takimet me Odën ekonomike gjermane. Në to morën pjesë shumë kompani që tashmë kanë investuar në Maqedoni, si dhe ndërmarrje që synojnë të investojnë atje.

Mickoski njoftoi se me përfaqësuesit e bizneseve u diskutuan përvojat e tyre të deritanishme dhe mundësitë për t’i bërë investimet më të suksesshme. Bisedimet trajtuan gjithashtu shtimin e investimeve dhe zgjerimin e kapaciteteve të kompanive, çka, sipas tij, do të ndikonte në rritjen e prodhimit të brendshëm bruto të ekonomisë së Maqedonisë.

Në vlerësimin e kryeministrit, dita e kaluar në Bon të Gjermanisë ishte në tërësi vërtet e suksesshme. Ai u shpreh se temat e diskutuara sot do të sjellin vlerë të shtuar për cilësinë e jetës në Maqedoni dhe për qytetarët e saj.

Duke përcjellë përshëndetje të përzemërta nga Dyseldorfi, Mickoski njoftoi se vizita në Gjermani do të vijojë edhe nesër.

Krahas kryeministrit, delegacioni qeveritar përbëhet nga Aleksandar Nikoloski, zëvendëskryeministër dhe ministër i Transportit, Timço Mucunski, ministër i Punëve të Jashtme dhe Tregtisë së Jashtme, Stefan Andonovski, ministër i Transformimit Digjital, si dhe Goce Dimovski, drejtor i ZZHTI-së.