Mickoski: Synojmë që brezi ynë ta anëtarësojë vendin në BE, pa cenuar identitetin, gjuhën dhe kulturën

Në fjalimin e mbajtur sot për 35-vjetorin e pavarësisë së vendit, kryeministri i RMV-së, Hristijan Mickoski, foli edhe për perspektivën evropiane. Ai deklaroi se po angazhohet që brezi i tij ta çojë vendin në Bashkimin Evropian, ndërsa nënvizoi se, përpara nisjes së këtij rrugëtimi, mbetet edhe një sfidë e fundit, kapërcimi i së cilës kërkon krijimin e besimit.

Sipas Mickoskit, besimi mund të ndërtohet përmes pranimit të fakteve, ndalimit të vendimeve të Gjykatës së të Drejtave të Njeriut në Strasburg lidhur me komunitetin maqedonas në Bullgari, dhënies fund të mohimit të së drejtës për përdorimin e gjuhës amtare maqedonase dhe ndërprerjes së kërkimit të origjinës së popullit maqedonas te një vendim i Kominternit komunist.

Kreu i qeverisë ritheksoi se orientimi i vendit është evropian, por paralajmëroi se gjatë këtij procesi nuk mund të pranohen kompromise që prekin identitetin, gjuhën dhe kulturën.

“Dëshiroj dhe punoj që të jem pjesë e brezit që do ta çojë vendin në Bashkimin Evropian. Është e vërtetë se për vendin nuk ekziston alternativë më e mirë. Megjithatë, secili prej jush duhet të jetë i vetëdijshëm se para nesh ndodhet edhe një sfidë e fundit, jo për ta përmbyllur këtë rrugë, por për ta nisur atë. Kjo nuk do të thotë se kemi ndonjë garanci se do ta përmbushim synimin, por vetëm se do të fillojmë të ecim në atë drejtim.

Kur dëgjohen ato thirrje hipokrite pafuqie nga kundërshtarët tanë politikë, ose së paku nga disa prej tyre, të cilët me vetëkënaqësi kërkojnë që problemi të zgjidhet, ata nuk e kuptojnë aspak se pikërisht vetë e krijuan atë. Duke pranuar në mënyrë aventureske një propozim, ata vendosën një kusht për avancimin tonë drejt anëtarësimit të plotë në BE”, shtoi Mickoski.