Mickoski: Po negociojmë me 5-6 investitorë për qendrat e të dhënave

Kryeministri i Maqedonisë së Veriut, Hristijan Mickoski, deklaroi se qeveria është në negociata me të paktën 5 ose 6 investitorë të mundshëm për ndërtimin e qendrave të të dhënave. Sipas tij, në mesin e kompanive të interesuara ndodhet edhe një korporatë e madhe shumëkombëshe, ndërsa Qeveria nuk do të heqë dorë nga kjo nismë, përcjell TV21.

Sa i takon shqetësimeve për ndikimin e mundshëm të këtyre projekteve te burimet natyrore dhe mjedisi, Mickoski tha se kompanitë e mëdha nuk do të investonin në to nëse do të përbënin rrezik.

Ai solli si shembull zhvillimin e inteligjencës artificiale dhe qendrave të të dhënave, duke pyetur se si do të ishte sot produkti i brendshëm bruto i Shteteve të Bashkuara të Amerikës pa këto fusha. Mickoski përmendi NVIDIA, Amazon, SpaceX dhe OpenAI si kompani shumëkombëshe globale, markat e të cilave vlejnë triliona, mijëra miliarda, dhe theksoi se ato nuk do të ishin krijuar nëse do të cenonin cilësinë e jetës së qytetarëve.

Kryeministri shtoi se Qeveria do të vijojë të jetë plotësisht e angazhuar në zbatimin e kësaj strategjie. Sipas tij, projektet parashikojnë edhe ndërtimin e stacioneve të energjisë me gaz, të cilat do të prodhojnë energjinë elektrike që do të përdoret më pas nga qendrat e të dhënave.