Mickoski paralajmëron ulje të re të akcizave për karburantet nga java e ardhshme

Kryeministri i Maqedonisë së Veriut, Hristijan Mickoski, theksoi sot se ekzekutivi vijon të jetë i angazhuar në zbatimin e masave që synojnë përmirësimin e jetesës së qytetarëve përmes politikave për çmimet e karburanteve.

Duke iu referuar përshkallëzimit të operacioneve ushtarake mes SHBA-së dhe Iranit në Gjirin Persik dhe bllokimit të përsëritur të Ngushticës së Hormuzit, ai pranoi se këto zhvillime krijojnë pasiguri të reja për tregun e naftës.

“Jemi të përgatitur për këto skenarë. Gjendja e jashtëzakonshme vlen deri më 20 korrik. Vlerësoj se tashmë janë krijuar premisat që të hënën të aplikojmë sërish ulje të akcizave si për benzinën pa plumb, ashtu edhe për naftën”, deklaroi Mickoski.

Ai sqaroi se fillimisht duhet pritur mbyllja e bursave gjatë ditës së sotme, për t’u pasuar nga një analizë e ecurisë së 15 ditëve të para.

“Qëndrojmë besnikë ndaj kësaj strategjie. Aktualisht kemi çmimin më të favorshëm të karburanteve, pa asnjë dyshim. Dikush mund të kundërshtojë: ‘Po të ardhurat tona janë në këtë nivel, ndërsa në Gjermani janë krejt ndryshe’. Por realiteti është që vlera e karburantit diktohet nga tregjet ndërkombëtare. Ne furnizohemi nga i njëjti burim si Gjermania. Nuk disponojmë ndonjë pus nafte në oborrin tonë për të furnizuar automjetet tona”, shtoi kreu i qeverisë.

Më tej, Mickoski shtroi pyetjen se si shpjegohet diferenca e madhe me vendet fqinje.

“Përse atje kushton dyfish? Përse në Shqipëri është 70 për qind më e kushtueshme? Përse në Greqi pothuajse dyfishohet? Përse në Serbi është 50 për qind më shtrenjtë? Këto janë rezultatet konkrete të politikave të kësaj Qeverie në funksion të rritjes së standardit të qytetarëve”, përfundoi Mickoski.