Mickoski: Nga java e ardhshme parashikohet rënie e konsiderueshme e çmimit të benzinës dhe dizelit

Kryeministri i Maqedonisë së Veriut, Hristijan Mickoski, ka bërë të ditur se vendi i tij vazhdon të mbajë çmimet më të ulëta të karburanteve në rajon, pavarësisht rritjes së regjistruar gjatë dy javëve të fundit. Ai theksoi se ekzekutivi po i mban nën vëzhgim lëvizjet në tregjet ndërkombëtare dhe pret që duke filluar nga java e ardhshme të materializohet një ulje më e dukshme e çmimeve, duke lënë të hapur mundësinë për masa të reja nëse situata do ta diktojë.

Gjatë një deklarate për mediat, Mickoski shpjegoi procesin e rishikimit të akcizave. “Taksat e akcizës analizohen çdo dy javë. Pjesa e dytë e muajit po i afrohet fundit dhe të hënën do të llogarisim mesataren për atë segment. Mbi këtë bazë do të formësohen çmimet e reja të derivateve. Fakti që për dy ditë me radhë çmimi ka rënë është inkurajues. Sot është stabilizuar në rreth 85-86 dollarë për fuçi, ndaj pres një ulje më të ndjeshme të çmimit të dizelit dhe benzinës duke filluar nga java e ardhshme.”

Ai shtoi se Qeveria po ndjek nga afër dinamikën në bursat botërore dhe nuk e përjashtoi mundësinë e ndërhyrjeve shtesë, vendim që do të merret pas përmbylljes së analizave në fund të korrikut.

Duke kujtuar specifikat e këtij produkti, Mickoski nënvizoi se ai tregtohet në bursë dhe të gjitha shtetet furnizohen nga i njëjti treg. Megjithatë, sipas tij, Maqedonia e Veriut gëzon “bindshëm çmimin më të ulët të naftës dhe benzinës pa plumb në rajon, madje ndër më të ulëtit edhe në nivel evropian”. Sa u përket masave të ardhshme, ai konfirmoi se po pritet përfundimi i periudhës deri më 31 korrik. “Kemi ndërhyrë njëherë përmes akcizave dhe, pasi të kryhen analizat e parashikuara me ligj, do të vendosim për hapat e mëtejshëm,” përfundoi Mickoski.