Mickoski: Nuk planifikojmë rritje të çmimit të energjisë elektrike

Kryeministri i Maqedonisë së Veriut, Hristijan Mickoski, deklaroi se Qeveria nuk po shqyrton mundësinë e rritjes së çmimit të energjisë elektrike. Sipas tij, po hartohet një plan për gjetjen e një formule që do të mundësonte uljen e çmimit ose, së paku, zgjerimin e tarifës së lirë, në ndryshim nga shumica e vendeve evropiane që po përgatiten t’i rrisin tarifat e energjisë.

Mickoski tha se vendi po i përballon me sukses faktorët që mund të ndikojnë në çmimet e energjisë, mes tyre krizën në Gjirin Persik dhe gjendjen aktuale të nivelit të lumit Danub.

Ai theksoi se synimi i Qeverisë nuk është të shkaktojë panik, por të veprojë me qetësi dhe përmes hapave gradualë që sjellin rezultate konkrete dhe përmirësojnë jetën e qytetarëve.

“Në këtë moment, në përfundim të sezonit të ujitjes, rezervuarët tanë janë të mbushur rreth 70 për qind, ndërsa kemi akumuluar pothuajse 500 gigavat-orë energji elektrike. Kjo është plotësisht e mjaftueshme për të qenë të sigurt dhe për të mos u përballur me probleme në furnizimin me energji elektrike të qytetarëve dhe industrisë”, u shpreh Mickoski.

Kryeministri nënvizoi gjithashtu se Qeveria po zbaton investime të mëdha kapitale në fushën e energjetikës. Në këtë kuadër, ai përmendi projektin e parkut me erë të kompanisë “Alcazar”, i cili do të shtrihet në komunat Shtip, Karbincë dhe Radovish dhe do të ketë vlerë rreth gjysmë miliardë dollarë në tre faza.

“Maqedonia në këtë moment është e sigurt dhe stabile, ndërsa paralelisht po hartojmë një plan për 10 vitet e ardhshme. Problemet e trashëguara nga e kaluara janë të mëdha, por ne nuk heqim dorë dhe po i zgjidhim”, deklaroi kryeministri.

Duke folur për çmimet e karburanteve, Mickoski tha se Maqedonia e Veriut ka pasur çmime rreth gjysmë euro më të ulëta për litër në krahasim me vendet fqinje dhe se, sipas tij, kjo politikë po vazhdon edhe aktualisht. Ai iu referua edhe krizës globale të energjisë, duke theksuar se lufta në Gjirin Persik dhe konflikti me Iranin kanë ushtruar presion të madh mbi tregjet energjetike.