Mickoski: Nuk do të ketë ndryshime kushtetuese sipas modelit të Bullgarisë

Kryeministri i Maqedonisë së Veriut, Hristijan Mickoski, ka deklaruar se amendamentet kushtetuese në formatin e tanishëm nuk do të miratohen. Ai u shpreh i hapur për dialog me të gjitha palët, në çdo vend, për të arritur një marrëveshje të qëndrueshme që do t’i hapte rrugën objektivit strategjik – integrimit të plotë në Bashkimin Evropian.

Mickoski shtoi se ekzekutivi do të vijojë me axhendën e reformave dhe do të fokusohet në rritjen e cilësisë së jetës dhe përmirësimin e kushteve për popullatën. Duke iu referuar pritshmërive të Brukselit, ai nënvizoi domosdoshmërinë e një procesi të bazuar në parime transparente dhe pa qasje selektive. Kryeministri vuri në dukje se ashtu sikurse Shkupi ka detyrime ndaj BE-së, edhe Sofja ka përgjegjësi për të garantuar të drejtat e njeriut.

“Neve na imponohet të pranojmë çfarë është rënë dakord, me justifikimin se ndodhemi jashtë unionit dhe aspirojmë anëtarësimin. Megjithatë, edhe Bullgaria ka angazhime, sidomos në fushën e të drejtave themelore. Ekzistojnë disa aktgjykime të Gjykatës Evropiane të të Drejtave të Njeriut në Strasburg për minoritetin maqedonas në Bullgari, që kanë të bëjnë me lirinë e organizimit dhe regjistrimin e shoqatave, dhe këto duhen zbatuar,” theksoi Mickoski.

Ai e përshkroi si politikë me dy pesha e dy masa situatën ku, sipas perceptimit të tij, Shkupit i kërkohet të bëjë lëshime shtesë vetëm për shkak të statusit të tij si vend kandidat. “Kjo nuk është një shuplakë ku merr çfarë të leverdis dhe lë pas atë që s’të konvenon. Bëhet fjalë për parime. Nëse bëni lëshime nga parimet vetëm kur ju leverdis, atëherë humbni kredibilitetin,” paralajmëroi ai.

Mickoski rikonfirmoi se objektivi final i Qeverisë mbetet aderimi i plotë në BE, jo thjesht hapja formale e negociatave përmes rrugëve të shkurtra apo zgjidhjeve provizore. Ai rikujtoi se Maqedonia e Veriut ka kryer më parë disa koncesione, si ndryshimi i flamurit, kartëmonedhave dhe emrit kushtetues, me premtimin se këto veprime do të shpejtonin rrugën evropiane, por shteti ende nuk e ka arritur anëtarësimin. “Retorika ishte gjithmonë e njejtë: dritarja e mundësive është e hapur, ky është momenti, bëni edhe këtë dhe procesi do të mbyllet. Por eksperienca na tregon të kundërtën. Unë thjesht po mundohem, në cilësinë e kryeministrit, t’i perceptoj gjërat më qartë,” përmbylli Mickoski/INA/.