Mickoski: Ligji për përfaqësim të drejtë është hartuar në përputhje të plotë me Kushtetutën

Kryeministri Hristijan Mickoski u shpreh se zgjidhja e re ligjore për përfaqësim të drejtë është përgatitur në harmoni të plotë me Kushtetutën dhe se për të janë marrë të gjitha rekomandimet pozitive nga Komisioni i Venecias.

Sipas tij, mënyra se si do të zbatohet kjo zgjidhje do të përcaktohet përmes akteve nënligjore, ndërsa ekzekutivi do të ngrejë edhe një organ të posaçëm për të mbikëqyrur zbatimin e ligjit.

Duke komentuar vërejtjet për shfuqizimin e balancuesit, Mickoski tha se ato kanë prapavijë politike. Ai nënvizoi se partitë që aktualisht ndodhen në opozitë kishin vlerësuar më herët se balancuesi e kishte humbur funksionin e vet dhe se duhej të zëvendësohej me një model të ri për përfaqësim të drejtë.