Mickoski kërkon përgjegjësi institucionale për personin që e kërcënoi

Kryeministri Hristijan Mickoski deklaroi se ishte informuar dje për kërcënimet e publikuara ndaj tij në rrjetet sociale, ndërsa për autorin e dyshuar është kërkuar masa e paraburgimit.

Sipas tij, personi në fjalë e kishte quajtur atë “derr” dhe kishte shkruar se do ta “therte në shesh”. Mickoski shtoi se në mesazhe ishin përfshirë edhe mallkime ndaj familjes së tij.

“Në fund të fundit, unë jam një institucion. Po të mos isha në këtë detyrë, e di se si zgjidhen çështje të tilla. Besoj se institucionet kanë vepruar me përgjegjësinë e tyre dhe se personi është siguruar përmes Ministrisë së Brendshme.

Shpresoj që edhe sistemi gjyqësor të ndërmarrë veprimet që i takojnë”, u shpreh kryeministri nga vendkalimi kufitar Tabanoc, gjatë përfundimit me sukses të projekteve të realizuara në kuadër të Dokumentit të Veprimit “BE kundër Krimit të Organizuar, Mbështetje për Tregtinë”.

Prokuroria Publike ka kërkuar paraburgimin e personit, i cili dyshohet se ka kërcënuar kryeministrin./Telegrafi/