Mickoski paralajmëron arrestime të tjera: Hetimet prekin ish-zyrtarë dhe funksionarë aktualë

Gjatë një interviste në emisionin “Vetëm intervistë” të televizionit Kanal 5, kryeministri Hristijan Mickoski deklaroi se priten arrestime të reja të ish-funksionarëve të lartë shtetërorë, por edhe të zyrtarëve aktualë ndaj të cilëve ka ose do të ketë dyshime.

Mickoski tha se Qeveria mbetet e vendosur për të zhvilluar një luftë konkrete dhe pa kompromis kundër korrupsionit.

Sipas tij, çdo denoncim për korrupsion është shoqëruar me veprime konkrete dhe arrestime. Ai theksoi se numri i të arrestuarve nga pushteti aktual nuk kufizohet vetëm te dy drejtorë, duke paralajmëruar se do të ketë persona të tjerë përgjegjës nëse shkeljet vazhdojnë. Kryeministri përmendi edhe aksionin e zhvilluar gjatë ditës, i cili lidhet me luftën kundër korrupsionit.

Ai shtoi se më herët ishte parandaluar kontrabanda e cigareve, aktivitet që kishte zgjatur për dekada. Mickoski deklaroi se ky është vetëm fillimi i hetimit dhe se së shpejti priten dëshmi të tjera për përfshirjen e funksionarëve të lartë të disa qeverive të kaluara në kontrabandën e cigareve.

Kryeministri u bëri thirrje qytetarëve që të raportojnë çdo rast korrupsioni, duke garantuar ruajtjen e diskrecionit të tyre. Ndërsa për çdo person ndaj të cilit vërtetohet se ka kryer veprime korruptive, ai tha se do të ketë përgjegjësi.