Mickoski hedh poshtë propozimin për reduktim të festave: Nuk preken të drejtat e punëtorëve

Kryeministri Hristijan Mickoski ka shprehur qëndrim të qartë kundër nismës së Odës Ekonomike për të pakësuar ditët e festave zyrtare dhe ato jopune.

Duke folur për këtë çështje, Mickoski theksoi se nuk ka asnjë dyshim se të drejtat që punëtorët kanë fituar duhet të mbrohen dhe të respektohen plotësisht.

Me këtë deklaratë, kryeministri praktikisht i dha fund diskutimit rreth propozimit të Odës, i cili synonte të ndryshonte rregullin aktual që parashikon ditë pushimi të hënën kur një festë shtetërore bie të dielën.

Nga Oda Ekonomike argumentohet se festat e shumta dëmtojnë produktivitetin dhe i ngarkojnë bizneset me shpenzime shtesë, prandaj kërkojnë një rishikim të kalendarit të ditëve jopune.

Edhe sindikatat kanë dalë hapur kundër kësaj nisme, duke paralajmëruar se çdo reduktim i ditëve jopune do të përbënte shkelje të të drejtave të punësuarve që tashmë janë konsoliduar.

Qëndrimi i Mickoskit bën të qartë se ekzekutivi nuk ka në plan të mbështesë asnjë masë që do t’u hiqte punonjësve benefite të cilat i gëzojnë aktualisht.