Mbi 307 mijë shtëpi të zbrazëta në Maqedoni, por çmimet vijojnë të rriten

Gjatë pesë viteve të fundit, Maqedonia ka shtuar më shumë se 36.000 njësi banimi, pavarësisht se rreth 36,6% e totalit të banesave rezultojnë të pabanuara, sipas regjistrimit të fundit të popullsisë. Në të njëjtën kohë, në zonat më të kërkuara të Shkupit dhe Ohrit, vlera e metrit katror ka tejkaluar tashmë pragun e 3.000 eurove.

Statistikat shtrojnë një dilemë gjithnjë e më të pranishme në tregun e pasurive të patundshme: përse kostot vijojnë të rriten, ndërkohë që oferta zgjerohet dhe mijëra apartamente mbeten të pabanuara?

Sipas të dhënave të Entit Shtetëror të Statistikave, të përpunuara nga portali financiar “Pari”, në intervalin 2020-2025 janë finalizuar 36.281 banesa, me një hapësirë të përgjithshme që kapërcen 3.26 milionë metra katrorë. Një banesë e re ka mesatarisht rreth 90 metra katrorë. Ndërtimet me tri dhoma kryesojnë me 12.038 njësi, të ndjekura nga ato me dy dhoma, të cilat numërojnë 11.129. Baza e të dhënave i regjistron banesat e përfunduara sipas numrit të dhomave dhe njësive administrative.

Ndërkaq, Regjistrimi i Popullsisë i vitit 2021 zbuloi se nga 839.174 banesa në krejt vendin, vetëm 531.987 ishin të banuara, çka përbën 63,4 për qind të fondit. Pjesa e mbetur prej 307.187 banesash, ose 36,6 për qind e totalit, figuronin të pabanuara. Pra, afërsisht një në çdo tri banesa nuk kishte banorë të përhershëm në çastin e regjistrimit. Megjithatë, ritmi i ndërtimeve nuk ngadalësohet.

Vetëm gjatë muajit qershor të këtij viti, janë dhënë leje ndërtimi për 754 banesa të reja./TV21/