Mbi 10 mijë amendamente mbajnë peng Kodin zgjedhor, Selmani: BE-ja kërkon shtet ligjor funksional

Mbi 10 mijë amendamente të opozitës kanë bllokuar në Kuvend miratimin e Kodit të ri zgjedhor. Përpjekjet për zgjidhjen e çështjes pritet të marrin drejtim në shtator, ndërsa partitë vazhdojnë të mbajnë qëndrime të kundërta.

VMRO-DPMNE-ja pret që ministri i ri i Drejtësisë, Jeton Shasivari, të ndërhyjë përmes bisedimeve me LSDM-në. Kjo e fundit kundërshton mundësinë që diaspora të votojë në mënyrë elektronike. Në të njëjtën kohë, Bashkimi Evropian kërkon që ligji të miratohet.

Profesori universitar Bashkim Selmani vlerëson se subjektet politike duhet të arrijnë marrëveshje për këtë kërkesë të rëndësishme evropiane, në mënyrë që t’i dëshmojnë Evropës jo vetëm zhvillimin e një procesi të rregullt zgjedhor, por edhe funksionimin e shtetit ligjor.

Sipas Selmanit, BE-ja synon që shtetet kandidate të zhvillojnë zgjedhje të besueshme dhe konkurruese, të kenë institucione demokratike funksionale, barazi ndërmjet subjekteve politike dhe transparencë në financimin e tyre, e cila aktualisht mungon. Ai theksoi gjithashtu nevojën për transparencë të lidhur drejtpërdrejt me votën e lirë dhe standardet evropiane. Për këtë arsye, reforma zgjedhore konsiderohet nga BE-ja pjesë e domosdoshme e konsolidimit të shtetit dhe së drejtës, si dhe e funksionimit të demokracisë dhe institucioneve demokratike, me qëllim avancimin e integrimit evropian.

Selmani nënvizoi se Kodi zgjedhor nuk përfaqëson vetëm një ligj që përcakton organizimin e zgjedhjeve, por edhe një kontratë besimi ndërmjet qytetarëve dhe shtetit. Sipas tij, rregullat e drejta prodhojnë rezultate të drejta dhe forcojnë legjitimitetin demokratik, i cili nuk vlerësohet vetëm në ditën e votimit, por edhe përmes cilësisë së rregullave që e garantojnë procesin.

Megjithatë, mundësia që marrëveshja të vonohet nuk përjashtohet. Në shtator pritet edhe vlerësimi i Gjykatës Kushtetuese për nismën e partisë “E Majta”, e cila lidhet me financimin e fushatave të partive politike. Çështje e diskutueshme vazhdon të jetë edhe modeli zgjedhor me gjashtë njësi.

Profesori Bashkim Selmani tha se rreziku i shtyrjes ekziston, pasi ende nuk janë kapërcyer dallimet politike për tema të rëndësishme, përfshirë votimin e diasporës, modelin zgjedhor dhe disa dispozita të tjera. Ai kujtoi se gjatë javëve të fundit është raportuar për ngadalësim të procedurës parlamentare si pasojë e numrit të madh të amendamenteve të dorëzuara.

Kuvendi nuk arriti ta miratonte Kodin e ri zgjedhor muajin e kaluar, në kuadër të dhjetë pikëshit të agjendës reformuese. Aktualisht nuk është përcaktuar një afat i ri për arritjen e dakordimit, ndërsa rekomandimet e OSBE-së kërkojnë që ndryshimet ligjore të mos bëhen shumë pranë zgjedhjeve.