Mbështetja financiare për vitin 2026, Hoxha apel fermerëve: Mos vononi aplikimet

Është hapur procesi i aplikimit për mbështetjen financiare në bujqësi për vitin 2026. Zëvendësministri i Bujqësisë, Pylltarisë dhe Ekonomisë së Ujërave, Albrim Hoxha, u kërkoi fermerëve t’i dorëzojnë kërkesat brenda afatit dhe të përfitojnë nga fondet që u takojnë.

Hoxha u bëri thirrje fermerëve që të mos presin ditët e fundit për të aplikuar. Ai theksoi se njësitë rajonale të Ministrisë së Bujqësisë, Pylltarisë dhe Ekonomisë së Ujërave janë në dispozicion për të ofruar ndihmë dhe sqarime për çdo paqartësi gjatë procedurës.

Aplikimet dorëzohen elektronikisht nëpërmjet portalit të Agjencisë për Mbështetje Financiare në Bujqësi dhe Zhvillim Rural. Skema përfshin mbështetje bazë dhe shtesë për të ardhurat, të përcaktuar sipas sipërfaqes dhe numrit të krerëve të bagëtive, pagesa të drejtpërdrejta për njësi produkti, ndihmë për elementet hyrëse në prodhim dhe përkrahje për ekonomitë e vogla bujqësore.

Përpara dorëzimit të kërkesës, aplikuesit duhet të verifikojnë dhe të përditësojnë në kohë informacionet e tyre në regjistrat përkatës. Për ta bërë më të lehtë procedurën, në faqen zyrtare të Agjencisë është vënë në dispozicion Udhëzuesi për Pagesat Direkte në Bujqësi për vitin 2026.

Kërkesat mund të paraqiten deri më 30 shtator 2026, kur përfundon afati i aplikimit.