Maqedoni, ndalohen dhjetë shoferë për drejtim të rrezikshëm të automjeteve

Gjatë 24 orëve të fundit, në vende të ndryshme të vendit, autoritetet kanë privuar nga liria dhjetë drejtues automjetesh, të dyshuar për drejtim të pakujdesshëm. Lajmi është bërë i ditur nga Ministria e Punëve të Brendshme (MPB).

MPB-ja njofton se katër prej tyre kanë drejtuar automjete pa e dhënë provimin e vozitjes, ndërsa dy janë konstatuar duke drejtuar nën ndikimin e alkoolit. Një 21-vjeçar nga Shkupi ka rezultuar me 1,99 promilë alkool në gjak, kurse te një 67-vjeçar nga Shtipi janë matur 1,77 promilë.

Tre persona të tjerë janë kapur në timon, edhe pse ndaj tyre ka pasur ndalesa aktive për drejtimin e automjeteve. Në Negotinë, policia ka ndaluar gjithashtu një të mitur që drejtonte motoçikletë pa patentë shoferi; mjeti rezultoi edhe i paregjistruar.

Sipas njoftimit të MPB-së, pasi të përfundojë dokumentimi i rasteve, ndaj personave do të dorëzohen kallëzime përkatëse penale.

Policia u ka bërë thirrje qytetarëve të respektojnë rregullat e komunikacionit dhe të mos marrin drejtimin e automjeteve pa patentë shoferi, nën efektin e alkoolit ose gjatë kohës kur ndaj tyre janë në fuqi ndalesa aktive, për të kontribuar në rritjen e sigurisë në trafik.