Maqedonasi godet shoferin e ambulancës në Serbi dhe arrestohet

Autoritetet serbe kanë ndaluar sot një qytetar nga Maqedonia e Veriut, pasi me kamionin e tij përplasi një punonjës të shërbimit të urgjencës.

Sipas njoftimit të Drejtorisë Policore të Leskovcit, personi u lokalizua dhe u vu në pranga pasi mjeti i tij i rëndë goditi shoferin e një ambulance të parkuar në korsinë e emergjencës, në afërsi të Grdelicës.

Autoritetet kanë caktuar masën e ndalimit deri në 48 orë për të dyshuarin.

Ngjarja e rëndë u regjistrua dje në orët e pasdites në zonën e Grdelicës, në momentin kur një autoambulancë që po transportonte një fëmijë 10-vjeçar nga Vranja në drejtim të Nishit pësoi defekt teknik.

Teksa drejtuesi i ambulancës kishte zbritur për të riparuar avarinë, një kamion e goditi atë.

Të dhënat paraprake tregojnë se kamioni u përplas me portën e hapur të ambulancës, e cila më pas e projektoi me forcë shoferin.

Si pasojë e përplasjes, ai u rrëzua dhe përplasi kokën në sipërfaqen e betonit, duke u dërguar me urgjencë drejt Qendrës Klinike Universitare të Nishit me plagë të rënda.

Rastësisht, një mjeke ndodhej në vendin e aksidentit dhe mori përsipër transportimin e djalit, i cili dyshohej se vuante nga apendiciti, duke e çuar me automjetin e saj personal në Nish.