LSDM paralajmëron: Borxhi shtetëror drejt 12 miliardë eurove, qeveria akuzohet për huamarrje të pakontrolluar

Lidhja Socialdemokrate e Maqedonisë (LSDM) ka shprehur shqetësim të thellë për gjendjen e financave publike, duke akuzuar qeverinë e Hristijan Mickoskit se po e zhyt shtetin në një borxh gjigant. Sipas kësaj partie, qeveria ka ndërmarrë një tjetër huamarrje, për shkak se arka e shtetit ka mbetur pa mjete.

Opozita pretendon se është miratuar një kredi e re me vlerë 1.3 miliardë euro, një veprim që sipas tyre vërteton paralajmërimet e mëparshme. “U konfirmua ajo që ne e thoshim prej muajsh: buxheti është i zbrazur dhe qeveria po merr hua të reja,” theksuan socialdemokratët në një reagim zyrtar.

LSDM e cilëson këtë si një huamarrje krejtësisht të jashtëzakonshme. Duke llogaritur edhe shumën e fundit, ata pretendojnë se për vetëm dy vjet në pushtet, qeveria aktuale do t’i ketë shtuar shtetit rreth 4 miliardë euro detyrime të reja. “Kjo është një barrë që nuk do ta mbajnë vetëm qytetarët e sotëm, por edhe fëmijët e tyre dhe gjeneratat që do të vijnë,” paralajmëroi partia.

Duke vazhduar me këtë ritëm, LSDM parashikon se deri në fund të vitit 2026, borxhi i përgjithshëm do të arrijë shifrën e rreth 12 miliardë eurove. Kjo shumë, sipas përllogaritjeve të tyre, do të përbënte mbi 65 për qind të Prodhimit të Brendshëm Bruto (PBB). Ata vënë në dukje se buxheti aktual vjetor është rreth 7 miliardë euro, por shtojnë se kjo rritje fondesh nuk po përkthehet në përfitime për qytetarin. “Nga këto para më shumë, populli nuk po sheh asgjë,” akuzoi LSDM.

Opozita pretendon se këto mjete në vend që të shkojnë për nevojat e qytetarëve, po derdhen në ato që i quajti “tenderë kriminalë”. Gjithashtu, politika e huamarrjes u lidh drejtpërdrejt me rënien e standardit jetësor. Sipas shifrave të paraqitura, kostoja minimale e jetesës për një familje me katër anëtarë është rritur me rreth 9.000 denarë gjatë dy viteve të fundit, ndërkohë që paga minimale është rritur vetëm për rreth 3.500 denarë.

Ky kontrast, sipas LSDM-së, dëshmon se punëtorët me pagë minimale jetojnë më keq se më parë, teksa akuzojnë kryeministrin Mickoski se kundërshton rritjen e kësaj page në 600 euro. Ata shtuan se mungojnë fondet për paga dhe pensione më të larta, pavarësisht huamarrjeve të mëdha dhe buxhetit të fryrë.

Në fokus të kritikave u vu edhe sistemi pensional. LSDM akuzoi ashpër pushtetin se synon të prekë kursimet e qytetarëve në shtyllën e dytë pensionale, duke përdorur termin “vjedhje”. Sipas tyre, përveç mungesës së masave konkrete për të ndihmuar qytetarët në krizën e kostos së jetesës, qeveria po vepron në mënyrë të dyshimtë edhe me aspektet ligjore.

LSDM vuri në pikëpyetje bazën ligjore të huasë së re, duke theksuar se ajo prej 1.3 miliardë eurosh nuk ishte përfshirë në ribalancin e fundit buxhetor. Në këtë kontekst, akuza të rënda u drejtuan ndaj ministres së Financave, Gordana Dimitrieska-Koçoska. “Koçoska, si zbatusja e urdhrave të Mickoskit, duhet ta ketë të qartë se për veprime të paligjshme në shkelje të Ligjit për Buxhetet, parashikohet përgjegjësi penale dhe dënim me burg,” përfundoi reagimi i opozitës socialdemokrate.