LSDM: Mickoski synon zgjedhje të parakohshme, por nuk do ta ketë mbështetjen tonë si justifikim

LSDM akuzon kryeministrin Hristijan Mickoski se në qasjen ndaj Bashkimit Evropian po ndjek të njëjtën narrativë që përdor presidenti serb, Aleksandar Vuçiq.

Nga kjo parti thonë se, siç e kanë paralajmëruar, “paratë po mbarojnë, ndërsa zgjedhjet po afrohen”. Sipas tyre, Mickoski deklaroi se nuk ka plan për zgjedhje të parakohshme, por shtoi se është i gatshëm nëse sfidohet nga opozita.

Sipas LSDM-së, një formulim i tillë është “copy-paste” nga mentori i tij dhe lideri i partisë simotër në Serbi, Aleksandar Vuçiq.

Ata theksojnë se edhe Parlamenti Europian e kundërshton këtë qasje, përmes një raporti ku shprehet shqetësim për lidhjet gjithnjë e më të ngushta me Qeverinë e Serbisë, për të cilën thuhet se po “zbaton një axhendë joliberale”.

Sipas LSDM-së, në thelb dhe në formë, Mickoski po vepron sipas të njëjtit model. Ata vlerësojnë se bëhet fjalë për të njëjtën narrativë, të njëjtat shprehje dhe të njëjtën strategji.

Partia kujton se, fillimisht, ai fyeu të gjithë qytetarët që mbështesin Bashkimin Evropian, duke i etiketuar si “llum i shoqërisë”, “të pakujdesshëm”, “mediokër” dhe “budallenj”.

Sipas tyre, kjo është e njëjta gjuhë që Vuçiq përdor ndaj qytetarëve të vendeve fqinje që përkrahin rrugën evropiane.

LSDM thekson se nuk do të shërbejë si alibi për Mickoskin nëse ai kërkon zgjedhje të parakohshme dhe se një justifikim të tillë nuk do ta marrë prej tyre.

Po ashtu, nga partia thonë se mbetet të shihet se cili nga të ashtuquajturat opozitë, përkatësisht nga satelitët e OBRM-PDUKM-së, do të përdoret për të kërkuar zgjedhje të parakohshme.

“Skenari ekziston, ne i njohim aktorët me pasaporta bullgare, dhe regjisori ‘patriot’ me ora të shtrenjta është shumë i njohur për ne. Mickoski dëshiron zgjedhje të parakohshme sepse nuk ka rezultate dhe po i mbarojnë paratë. Ai dëshiron zgjedhje sepse dëshiron të mbijetojë kolapsin politik që vetë shkaktoi”, thonë nga LSDM.

Nga atje shtojnë se pyetja nuk është nëse opozita është e gatshme, por nëse qytetarët e Maqedonisë janë gati për zgjedhje të parakohshme.