LSDM kërkon publikimin e dokumenteve për sigurinë e ujit në Gostivar

LSDM ka reaguar përmes një komunikate për media ndaj deklaratave të ndryshme të zyrtarëve të Qeverisë lidhur me cilësinë e ujit në Gostivar. Sipas kësaj partie, Klekovski ka bërë të ditur se uji pritet të jetë i sigurt për t’u pirë deri në fund të javës, ndërsa kryeministri Hristijan Mickoski ka deklaruar se në ujë janë zbuluar “baktere të reja”.

“Secili po paraqet versionin e vet të ngjarjes, ndërsa qytetarët kanë mbetur të hutuar dhe nuk dinë si të veprojnë. Mbi 4,000 njerëz janë helmuar në Gostivar, ndërsa Qeveria e Mickoskit ende nuk ka publikuar asnjë dokument për ujin. Pse nuk publikohet një dokument? Nuk ka dokumente, analiza, nënshkrime apo miratim”, thuhet në reagimin e LSDM-së.

Partia opozitare pyet se si mund t’u kërkohet qytetarëve të kenë besim kur mungon raporti zyrtar, personi që e ka nënshkruar dhe autoriteti që ka miratuar përdorimin teknik të ujit. Sipas LSDM-së, deklaratat e Mickoskit dhe Klekovskit nuk janë të besueshme, pasi ata “gënjejnë shumë”.

LSDM pretendon gjithashtu se rezultatet janë fshehur dhe se kjo ka sjellë mbi 4,000 infeksione, si dhe shpërthimin e një epidemie të verdhëzës në Gostivar. Në reagim kritikohet edhe angazhimi i Ministrit të Policisë në çështjen e furnizimit me ujë dhe hiperklorinimit, duke u vlerësuar se ai nuk ka njohuritë apo ekspertizën e nevojshme për këtë fushë.

“Cili institucion u garanton qytetarëve ujë të pastër teknik? Në emër të qytetarëve të Maqedonisë dhe Gostivarit, kërkojmë që sot të publikohen raportet për ujin në Gostivar. Qytetarët kërkojnë vetëm diçka të thjeshtë: ujë të pastër dhe emrin e personit që garanton se ai është i pastër”, deklarojnë nga LSDM./Telegrafi/