LSDM: Mickoski e riktheu ujin në përdorim në Gostivar, por ende nuk ka publikuar dokumentet e analizave

LSDM deklaron se prej ditësh ka paralajmëruar vazhdimisht për ndotjen e ujit në zona të ndryshme të Maqedonisë, duke akuzuar qeverinë e Mickoskit dhe grupin e tij të organizuar kriminal se po i mbajnë të fshehura të dhënat.

Sipas kësaj partie, uji i pijshëm në Gostivar është lejuar sërish për përdorim nga Mickoski, ndërsa deri tani nuk është bërë publike asnjë dëshmi dokumentare mbi cilësinë e tij.

Në reagimin e LSDM-së thuhet se Klekovski, i cili “ishte gjithashtu në ekskursion”, nuk ka dalë ende me një njoftim, ndonëse më herët kishte deklaruar se rezultatet e para do të ishin të gatshme rreth 20 gushtit. Partia pyet se përse, në vend të Kryeministrit dhe Ministrit të Shëndetësisë, një polic po ngre dolli dhe po flasë për “shijen” e ujit.

LSDM pretendon se në Gostivar institucionet kanë treguar neglizhencë të plotë. Sipas saj, analizat kishin evidentuar ndotje fekale të ujit, por qytetarët nuk ishin paralajmëruar dhe për ditë të tëra kishin konsumuar ujë të helmuar. Në deklaratë thuhet gjithashtu se edhe vetë spitali ishte i helmuar.

“Fillimisht një ‘polic’, ministri Toshkovski, e hiperkloroi ujin, ndërsa më pas një tjetër, Angelov, e riktheu në përdorim me një dolli”, shprehet LSDM. Partia shton se që nga nisja e krizës nuk është paraqitur asnjë ekspert, nuk është publikuar asnjë dokument me analiza dhe nuk ka pasur asnjë institucion apo person përgjegjës që të garantojë saktësinë e të dhënave.

Gjithashtu, LSDM akuzon se Prokuroria e drejtuar nga Savevski është “plotësisht në një ekskursion”, pa dhënë asnjë shenjë apo reagim. Sipas partisë, kanë kaluar pesë javë dhe ende nuk ka asnjë person përgjegjës për situatën në Gostivar.

“Pasi qytetarët për shumë vite kanë njohur lajmet e rreme dhe aferat e sajuara, tani po përballen me një formë të re fushate: talljen e hapur”, deklarojnë nga LSDM. Ata bëjnë të ditur se në mbi 50 vende në Maqedoni nuk janë publikuar analizat e ujit, ndërsa vetëm gjatë tre ditëve të fundit janë regjistruar edhe dy raste të tjera me substanca toksike në ujë, në Demir Kapi dhe në ujin mineral në Krivogashtani.