LSDM akuzon Qeverinë: Rezultatet për ujin në Gostivar po mbahen të fshehta për të shmangur përgjegjësinë

LSDM-ja akuzoi sot OBRM-PDUKM-në, partinë në pushtet, se ka çuar në degradimin e institucioneve shtetërore.

“A ekziston ende dikush që i beson seriozisht Mickoskit?

Si mund t’i kërkohet publikut të ketë besim te një prokurori, kur Komisioni Evropian vetëm pak ditë më parë publikoi një raport në të cilin evidentohen qartë ndikimet politike mbi të, përkatësisht ndikimi i Mickoskit?

A nuk bëhet fjalë për të njëjtën prokurori, drejtuesin e së cilës Mickoski e cakton dhe e thërret nga foltorja e Kuvendit, ndërsa ushtron trysni ndaj saj përmes mediave dhe e përdor për të dhënë me telefon urdhra për përndjekje politike?

Për çfarë arsye nuk bëhen publike rezultatet e analizave të ujit në Gostivar?

A po i mban të fshehura këto rezultate e njëjta prokurori, sipas urdhrit të Mickoskit, për shkak se ato mund të zbulojnë gjetje të tjera dhe të hapin çështjen e përgjegjësive të reja?

OBRM-PDUKM-ja vijon përpjekjet për ta kufizuar përgjegjësinë vetëm si ‘morale’ dhe për ta transferuar atë në nivelin lokal, ndërkohë që institucionet nën kontrollin e saj heshtin dhe nuk i nxjerrin informacionet.

Banorët e Gostivarit, sikurse të gjithë qytetarët e Maqedonisë, kanë të drejtë ta mësojnë të vërtetën e plotë, në vend që të përballen me arsyetime dhe me përgjegjësi selektive që synojnë mbrojtjen e strukturës kriminale të qeverisë”, deklarojnë nga LSDM-ja./Telegrafi/