Ligji i ri në Maqedoninë e Veriut ashpërson rregullat për trotinetët elektrikë

Saranda Imeri Stafai, deputete e koalicionit VLEN, ka njoftuar se po propozohen masa më të forta për përdorimin e trotinetëve elektrikë, me synim rritjen e sigurisë në komunikacion dhe uljen e numrit të aksidenteve.

Sipas saj, me ligjin e ri parashihet që shpejtësia maksimale të kufizohet në 20 kilometra në orë, drejtimi i trotinetëve elektrikë të lejohet vetëm nga mosha 18 vjeç, si dhe të vendosen ndëshkime më të rënda për përdoruesit e papërgjegjshëm.

Imeri Stafai ka theksuar se në dy vitet e fundit, dhjetëra persona kanë humbur jetën dhe qindra të tjerë janë plagosur rëndë në aksidente trafiku, çka sipas saj e bën të domosdoshëm forcimin e masave të sigurisë.

“Qëllimi nuk është ndëshkimi, por mbrojtja e jetëve, veçanërisht e të rinjve. Më shumë rend në rrugë do të thotë më pak aksidente dhe një e ardhme më e sigurt për të gjithë pjesëmarrësit në komunikacion”, ka deklaruar deputetja e VLEN-it. /INA/