Lidhja Shqiptare zhvilloi Kuvendin e saj të parë dhe zgjodhi drejtuesit e rinj

Mbrëmjen e së shtunës, në Strugë, Lidhja Shqiptare mbajti mbledhjen e parë konstituive të Kuvendit të partisë, ku u morën disa vendime me rëndësi për organizimin e brendshëm, mes tyre zgjedhja e Kryesisë së re dhe përcaktimi i hapave për ristrukturimin e degëve në mbarë vendin.

Kuvendi, me shumicë absolute votash, miratoi përbërjen e re të Kryesisë së partisë, ndërsa një pjesë e vendeve u la e paplotësuar, me qëllim që ato të plotësohen pasi të konsolidohen strukturat lokale dhe të përfshihen anëtarë të rinj.

Në Kryesinë e Lidhjes Shqiptare bëjnë pjesë Elmi Aziri, Driton Nebiu, Izeir Memedi, Naim Bajrami, Ismail Ibishi, Zulfi Adili, Ilire Dauti, Vjollcë Berisha, Adnan Neziri, Berat Jakupi, Artina Qazimi, Arben Zeqiri, Remzi Mehmedi, Tiron Jajaga, Ilirjan Fetahu, Premtime Zylali, Arsim Dalipi, Halit Ferati, Bujar Bajrami dhe Bekim Tateshi.

Një tjetër vendim i marrë në këtë mbledhje ishte edhe miratimi për ristrukturimin e degëve të partisë, zhvillimin e kuvendeve lokale, si dhe zgjedhjen e kryesive dhe kryetarëve të degëve.

Me mbështetje unanime nga kuvendarët, deputeti Elmi Aziri u zgjodh Kryetar i Kuvendit të Lidhjes Shqiptare.

Në diskutimet që u zhvilluan për gjendjen aktuale politike në vend, kryetari i Lidhjes Shqiptare, Ziadin Sela, shpalosi qëndrimet e partisë lidhur me zhvillimet politike, duke ngritur shqetësimin për atë që ai e cilësoi si përkeqësim të pozitës së shqiptarëve dhe cenim të të drejtave kombëtare.

Sipas Selës, Lidhja Shqiptare do të vijojë të mbrojë kauzën kombëtare dhe do të kundërshtojë çdo vendim që, sipas tij, prek interesat e shqiptarëve. Ai deklaroi gjithashtu se subjekti politik nuk do të pranojë kompromise apo kalkulime për interesa të ngushta personale në dëm të interesit kolektiv, duke e ruajtur autonominë politike të partisë.