Lidhja energjetike Shqipëri-Maqedoni e Veriut në prag të përfundimit, nënstacioni i Ohrit hyn në fazë testimesh

Projekti i interkoneksionit energjetik 400 kilovolt midis Shqipërisë dhe Maqedonisë së Veriut po hyn në etapën finale të zbatimit, sipas deklaratave të kreut të MEPSO-s, Burim Latifi. Ai theksoi se punimet në nënstacionin 400 kV të Ohrit kanë shënuar progres të ndjeshëm drejt finalizimit dhe pas montimit të pajisjeve kryesore e ndihmëse, kanë filluar testimet teknike dhe operacionale.

Pas një vizite inspektimi në terren, Latifi u shpreh se këto procedura përbëjnë fazën e fundit përpara se nënstacioni të bëhet funksional, duke qenë një hallkë kyçe e projektit që synon bashkimin e rrjeteve elektroenergjetike të dy shteteve.

Drejtori i SHA MEPSO shtoi se po ecet me ritëm edhe në pjesën tjetër të nismës, konkretisht në linjën e transmetimit 400 kV që lidh Manastirin me Elbasanin. Ai bëri të ditur se ka filluar ngritja e shtyllave, disa prej të cilave janë vendosur tashmë, ndërsa aktiviteti vijon me intensitet në pika të tjera përgjatë gjurmës së linjës. Sipas tij, ky avancim tregon angazhimin e palëkundur për ta çuar projektin në fund brenda afateve të parashikuara.

Nga ana tjetër, formacioni politik VLEN e cilësoi këtë projekt si pjesë të një strategjie më të gjerë për zhvillimin e Korridorit 8, i cili nuk përfshin vetëm lidhjet rrugore dhe hekurudhore, por shtrihet edhe në fushën energjetike, duke shërbyer si urë lidhëse mes Maqedonisë së Veriut, Shqipërisë dhe tregut evropian të energjisë.

Nga VLEN u vlerësua se realizimi i plotë i kësaj vepre do të gjenerojë një lidhje të re me rëndësi strategjike për dy vendet, do të forcojë stabilitetin e rrjetit të transmetimit, do të rrisë mundësitë e shkëmbimeve ndërkufitare dhe do të përshpejtojë integrimin e tregut energjetik rajonal. Për këtë forcë politike, Korridori 8 tejkalon kuptimin e thjeshtë të një projekti infrastrukturor dhe përfaqëson një vizion zhvillimi që e afron vendin me rajonin dhe Bashkimin Evropian nëpërmjet korridoreve moderne energjetike, rrugore dhe hekurudhore.

Projekti nuk ka qenë pa kontradikta. Disa muaj më parë, partia opozitare BDI hodhi akuza ndaj MEPSO-s dhe drejtorit Latifi, duke pretenduar se e kishin cenuar seriozisht ecurinë e interkoneksionit. Sipas BDI-së, veprimet që lidhen me ekzekutimin e garancisë bankare ndaj firmës kroate Dalekovod dhe nënshkrimi pasues i një kontrate të re me vlerë 19.3 milionë euro pikërisht me të njëjtën kompani, ngrenë pikëpyetje mbi profesionalizmin e vendimeve dhe ndikimin e interesave partiake.