Kontrolle policore në mbarë vendin, 14 të arrestuar për drejtim të pakujdesshëm të automjetit

Nëpunësit policorë kanë arrestuar 14 persona gjatë 24 orëve të fundit në kontrollet e zhvilluara në të gjithë territorin e shtetit. Ata dyshohen për veprën penale “drejtim i pakujdesshëm i mjetit motorik”, të parashikuar në nenin 297-a të Kodit Penal.

Nga të ndaluarit, 10 persona, përfshirë tre të mitur, janë kapur duke drejtuar automjete pa patentë shoferi. Te njëri prej këtyre drejtuesve është gjetur edhe një lëndë e bardhë në formë pluhuri. Tre persona të tjerë kanë qenë nën ndikimin e alkoolit gjatë drejtimit të automjetit, ndërsa njëri prej tyre është përfshirë në një aksident rrugor. Një person është ndaluar pasi ka lëvizur në kahun e kundërt në një rrugë njëkahëshe. Pas dokumentimit të plotë të secilit rast, ndaj personave do të dorëzohen kallëzimet përkatëse penale.

Ministria e Punëve të Brendshme u ka bërë thirrje të gjithë pjesëmarrësve në trafik që të zbatojnë me përpikëri rregullat dhe dispozitat rrugore. MPB-ja kërkon që qytetarët të mos drejtojnë automjete pa patentë shoferi, kur ndaj tyre është shqiptuar masë ndalimi për drejtim, apo nën ndikimin e alkoolit. Sipas ministrisë, përgjegjshmëria në komunikacion është detyrim i përbashkët dhe kushti kryesor për rritjen e sigurisë së të gjithë qytetarëve.