Komuna e Tetovës nis aksionin për mbledhjen e mbi 6 milionë eurove të taksave të papaguara

Komuna e Tetovës ka ndërmarrë një fushatë për arkëtimin e taksës së pronës dhe detyrimeve të tjera komunale të papaguara. Borxhi i akumuluar gjatë dy viteve të fundit kapërcen 6 milionë euro, ndërsa pjesën kryesore të debitorëve e përbëjnë qytetarët, së bashku me një numër kompanish private.

Nuredin Dehari, drejtor i Financave në Komunën e Tetovës, bëri të ditur se debitorët kanë një afat prej një jave për të shlyer detyrimet. Në të kundërt, komuna do të nisë procedurat përmbarimore për mbledhjen e borxheve dhe zhbllokimin e llogarisë komunale.

“Detyrimet e përgjithshme të qytetarëve dhe kompanive ndaj Komunës së Tetovës arrijnë në 340 milionë denarë. Pjesa më e madhe e kësaj shume u takon qytetarëve që nuk kanë paguar taksën e pronës. Borxhi i mbetur lidhet me kompanitë, të cilat nuk kanë shlyer tarifat përkatëse dhe taksat e pronës. Komuna i ka njoftuar qytetarët dhe u ka dorëzuar vendimet. Për ata që nuk kanë mundur t’i marrin vendimet në adresat e tyre, është dërguar një njoftim që t’i drejtohen komunës. Nga 1 tetori do të fillojmë procedurat ndaj të gjithë atyre që nuk kanë paguar detyrimet për vitet e kaluara”, deklaroi Nuredin Dehari.

Përveç detyrimeve ndaj komunës, qytetarët kanë borxhe që tejkalojnë një milion euro edhe ndaj Ndërmarrjes Publike të Shërbimeve “Shari”, të krijuara gjatë dy viteve të fundit. Në ndryshim nga NP “Tetova”, kompania “Shari” nuk ka detyrime të prapambetura dhe paraqitet financiarisht e qëndrueshme.

Valon Zekiri tha se kompania aktualisht nuk ka borxhe aktive dhe se gjatë gjashtëmujorit të parë të vitit ka regjistruar mbi 6 milionë denarë suficit. Ai shtoi se arkëtimi i detyrimeve do të mundësonte investime të rëndësishme në infrastrukturën nëntokësore, ndërsa theksoi se problemet me pagat janë tejkaluar dhe ndërmarrja funksionon me të ardhurat e mbledhura. Zekiri u bëri thirrje qytetarëve debitorë që të kontaktojnë zyrat e kompanisë dhe të shlyejnë borxhet.

Probleme me arkëtimin vazhdon të ketë Ndërmarrja Publike e Shërbimeve “Tetova”, e cila ende ka një nivel të ulët të mbledhjes së detyrimeve. Megjithatë, borxhi publik i saj ka pësuar rënie të ndjeshme: nga rreth 10 milionë euro në vitin 2021, në rreth 2.6 milionë euro aktualisht.

Për të ndihmuar në vijimin e aktivitetit dhe në konsolidimin financiar të kësaj ndërmarrjeje, Komuna e Tetovës po akordon donacione të veçanta në bllok, të destinuara për pagesat dhe kontributet e punonjësve.