Klekovski: Mbi 30,4 milionë denarë janë investuar në pajisje moderne për Spitalin e Manastirit

Gjatë periudhës 2024–2026, Spitali klinik i Manastirit ka blerë aparaturë moderne mjekësore me vlerë mbi 30,4 milionë denarë. Pajisjet e reja po zëvendësojnë aparate që ishin në përdorim prej më shumë se 20 vjetësh dhe për të cilat nuk ofroheshin më servisim dhe mbështetje teknike.

Ministri i Shëndetësisë, Sasho Klekovski, theksoi se një ndër ndërhyrjet më të rëndësishme është ndërrimi i digestorit në Repartin e patologjisë. Sipas tij, aparati i mëparshëm ishte siguruar rreth 55 vjet më parë, në kohën kur u themelua spitali.

Në procesin e modernizimit përfshihet edhe blerja e një shpueseje elektrike për ortopedi. Reparti i oftalmologjisë është pajisur me aparat për ndërhyrjet e kataraktës përmes metodës fako dhe me aparat për ekografi, ndërsa për urologjinë është siguruar një set për resekcion monopolar. Reparti i mjekësisë interne ka marrë gjithashtu një kolonoskop dhe një gastroskop të ri, bëri të ditur Klekovski.

Lista e aparaturave të siguruara përfshin edhe pajisjen për tomografi koherente optike, aparatin e ri DEXA për mjekësi fizikale dhe rehabilitim, si dhe një robot e zgjidhje moderne softuerike të integruara me sistemin PACS. Falë këtyre investimeve, disa reparte të spitalit kanë rritur ndjeshëm mundësitë e tyre diagnostikuese dhe operative.

Ndërkohë, është hapur procedura për sigurimin e aparaturës që mundëson biopsinë e prostatës nën udhëheqjen e ekografisë. Kjo metodë moderne diagnostikuese do të përdoret për herë të parë në Spitalin klinik të Manastirit, duke u ofruar pacientëve nga Manastiri dhe mbarë rajoni diagnostikim më të shpejtë, më të saktë dhe më të qasshëm në spitalin e tyre amë.

Përveç modernizimit të pajisjeve, institucioni ka forcuar edhe stafin profesional mjekësor. Nga korriku i vitit 2024 e deri më sot, në spital janë realizuar 61 punësime me afat të pacaktuar.

Klekovski deklaroi se, pas shumë vitesh gjatë të cilave është punuar me aparaturë të vjetruar, Spitali klinik i Manastirit tashmë po pajiset sipas standardeve të mjekësisë moderne. Ai nënvizoi se nuk bëhet fjalë vetëm për ndërrimin e pajisjeve, por për një investim konkret që synon diagnostikim më të sigurt, trajtim më cilësor dhe mbrojtje më të mirë shëndetësore për qytetarët e Manastirit dhe të gjithë rajonit.