KE për rastin e Iva Mihailovës: Brukseli nuk përfshihet në çështjet dypalëshe

Komisioni Evropian ka reaguar lidhur me rastin e Iva Mihailovës, duke theksuar se Brukseli nuk ndërhyn në çështjet që u përkasin marrëdhënieve dypalëshe.

Në një përgjigje për “TV24”, KE sqaroi se ofrimi i ndihmës konsullore është kryesisht përgjegjësi e autoriteteve kombëtare. Komisionit iu kërkua të komentonte nëse Ministria e Jashtme e RMV-së e kishte informuar për rastin, nëse qëndrimi i autoriteteve bullgare përputhet me detyrimet e Bullgarisë si shtet anëtar i BE-së dhe nëse Brukseli do të kërkojë informacione të tjera për çështjen Mihailova.

Zëdhënësi i Komisionit Evropian përsëriti se institucioni nuk ndërhyn në çështjet dypalëshe, ndërsa ndihma konsullore mbetet kryesisht në kompetencën e autoriteteve kombëtare.

Shkupi ka kërkuar arrestimin e saj përmes një urdhërarresti ndërkombëtar, por Sofja ka refuzuar ekstradimin, duke iu referuar Konventës Evropiane dhe faktit se nuk ekziston një marrëveshje e ratifikuar. Mihailova u largua nga Maqedonia vetëm disa ditë pas takimit kokë më kokë mes Mucunskit dhe Çamovas.

Ndërkohë, nga Berlini, ministrja e Jashtme bullgare Petrova-Çamova përcolli një mesazh për rëndësinë e vlerave evropiane. Gjatë takimit me homologun e saj gjerman Wadeful, ajo deklaroi se respektimi i të drejtave themelore dhe mosdiskriminimi janë ndër vlerat kryesore të BE-së./Telegrafi/