Kasami paralajmëron lëvizje të reja në VLEN, Shabani dhe Limani mohojnë negociatat

Bilall Kasami nga VLEN ka deklaruar sot se në skenën politike po zhvillohen bisedime për përfshirje të reja në këtë koalicion, ndërsa nuk ka bërë të ditur emrat e personave për të cilët bëhet fjalë.

Sipas tij, zhvillimet konkrete pritet të shfaqen gjatë ditëve në vijim. Kasami theksoi se përçarja e opozitës dhe pakënaqësitë brenda strukturave të saj kanë krijuar hapësirë për lëvizje dhe kontakte të reja politike.

“Në skenën politike ka zhvillime dhe lëvizje të tilla, sidomos në rrethanat kur opozita është e përçarë dhe në shumë struktura të saj ka pakënaqësi. Në këtë drejtim po zhvillohen bisedime dhe besoj se ditët në vijim do të sjellin edhe veprime konkrete”, tha Kasami.

Spekulimet për kalimin e kryetarit të Vrapçishtit, Isen Shabani, dhe kryetarit të Komunës së Gostivarit, Valbon Limani, në VLEN janë mohuar nga vetë të apostrofuarit.

Shabani publikoi një fotografi me kryetarin e Aleancës për Shqiptarët, Arben Taravari, të shoqëruar me mbishkrimin “Vazhdojmë…”, duke lënë të kuptohet se vazhdon të jetë pjesë e ASH-së.

Edhe Valbon Limani deklaroi se mbetet anëtar i Aleancës për Shqiptarët, të cilën e cilësoi si parti autonome. Ai sqaroi se, përveç komunikimeve kolegiale për bashkëpunimin ndërkomunal në kuadër të Rajonit të Pollogut ose programeve qeveritare, nuk ka pasur bisedime apo negociata të tjera.

Limani mohoi gjithashtu çdo zhvillim që mund të lidhet me rikonfigurimin e skenës politike dhe bëri të ditur se vijojnë përgatitjet për Kongresin e Aleancës për Shqiptarët, i cili do të mbahet së shpejti. Ai shtoi se vëmendja e tij është e përqendruar te puna e Komunës së Gostivarit, realizimi i projekteve dhe shërbimi ndaj qytetarëve, duke i cilësuar spekulimet mediatike si të pambështetura në fakte.