Jotova: Bullgaria do të vijojë të mbrojë të drejtat e bullgarëve në Maqedoninë e Veriut

Presidentja bullgare Ilijana Jotova tha se vendi i saj nuk do t’i braktisë bullgarët në Republikën e Maqedonisë së Veriut dhe do të vazhdojë të angazhohet për mbrojtjen e të drejtave të tyre.

Jotova mori pjesë në ceremoninë kombëtare për 123-vjetorin e Kryengritjes së Ilindenit dhe të Preobrazhenies, të zhvilluar në zonën e Petrova Nivës.

Gjatë fjalës së saj, presidentja bullgare u shpreh kundër ndarjeve dhe gjuhës së urrejtjes, duke theksuar se përgjegjësia për t’i kundërshtuar ato u takon si politikanëve, ashtu edhe shoqërisë.

“Sot nuk mund të mos shohim edhe një tjetër realitet – plagët dhe ndarjet e shumta. Në Republikën e Maqedonisë së Veriut, njerëzit flasin për bullgarët, edhe pse historia jonë është e përbashkët. Çfarë kemi për të ndarë?”, deklaroi Jotova.

“Ne nuk do të heqim dorë nga ju dhe do t’i mbrojmë të drejtat tuaja – të drejtat e çdo njeriu. Për mua, kjo nuk është një deklaratë politike, por kuptimi i vërtetë i amanetit të popullit të Ilindenit, i cili e dinte se liria, shtetësia dhe liria e çdo individi mund të arrihen vetëm përmes unitetit dhe bashkimit”, tha ajo.

Jotova përkujtoi gjithashtu sakrificat e pjesëmarrësve në Kryengritjen e Ilindenit dhe të Preobrazhenies të vitit 1903, si dhe ekzistencën e shkurtër të Republikës së Stranxhës.

“Nuk duhet t’i harrojmë ato 20 ditë lirie dhe as Republikën e Stranxhës. Ajo u lag me gjak, ndërsa toka bullgare, e vuajtur për shumë kohë, u mbush me varre të pashënuara. Megjithatë, Bullgaria u ringjall këtu”, u shpreh presidentja.