Janevska: Arsimi nuk duhet të përdoret për interesa politike

Ministrja e Arsimit dhe Shkencës, Vesna Janevska, kërkoi që politika të mos ndërhyjë në arsim, duke e cilësuar miratimin e tre ligjeve për arsimin e lartë, që aktualisht ndodhen në procedurë parlamentare, si një hap të rëndësishëm për rritjen e cilësisë universitare dhe për përmirësimin e renditjes së institucioneve të arsimit të lartë në listat ndërkombëtare.

Sipas saj, arsimi nuk mund të shërbejë si mjet për përfitime politike. Janevska paralajmëroi se informacionet e pasakta, të shpërndara për të siguruar pikë politike apo pëlqime, dëmtojnë sistemin dhe e vështirësojnë ndërtimin e një arsimi cilësor.

“Kur politika hyn në arsim, besoj se dëmi është për të gjithë. Informacioni i papërshtatshëm që vendoset për hir të pikëve politike ose fitimit të pëlqimeve shkakton dëme në sistemin arsimor dhe pengon arsimin cilësor”, theksoi ministrja.

Duke folur për mungesën e universiteteve të Maqedonisë së Veriut në edicionin e fundit të listës së Shangait, si dhe për mundësinë që ndryshimet ligjore të ndikojnë në renditje, ministrja tha se nuk pret rezultate të menjëhershme ose ndryshime të mëdha brenda një kohe të shkurtër.

“Nuk prisnim që në një periudhë prej dy vitesh, veçanërisht pa ligjet e reja, të kishte ndonjë lëvizje drastike në listën e Shangait. Presim që tre ligjet që janë aktualisht në procedurë parlamentare ta rrisin ndjeshëm cilësinë në arsimin e lartë në një periudhë të parashikueshme, por edhe të hapin tregues të tjerë që përdoren jo vetëm nga listat e Shangait, por edhe nga listat e tjera të renditjes, në mënyrë që të mund të ngjitemi në ato lista”, tha Janevska.

Janevska bëri të ditur se Ministria ka zhvilluar deri tani një debat me komunitetin akademik për zgjidhjet e propozuara ligjore. Ajo shtoi se subjektet politike nuk kanë paraqitur komente apo propozime konkrete.

E pyetur për pasojat e mundshme nëse ligjet do të bllokoheshin në Kuvend, ajo nënvizoi se çdo vërejtje për dispozita të veçanta mund të shqyrtohet gjatë debatit parlamentar, por arsimi duhet të mbetet jashtë përllogaritjeve politike.

“Kuvendi është vendi ku do të përballemi me të gjitha argumentet. Nëse ka komente për dispozita të caktuara ligjore, ato do të diskutohen atje. Por, do ta përsëris edhe një herë, mbajini duart e politikës larg arsimit. Të rinjtë tanë meritojnë arsim cilësor, dhe duke miratuar këto ligje do të rrisim cilësinë e arsimit të lartë, gjë që lidhet drejtpërdrejt me renditjen ndërkombëtare të universiteteve”, theksoi ministrja.