Ilire Dauti në qendër të kritikave për deklaratën “Mos lexo më arabisht” ndaj Afrim Gashit

Pas një deklarate drejtuar Afrim Gashit, kryetar i Kuvendit, deputetja Ilire Dauti është bërë objekt kritikash. Fjalët e saj ishin: “Shpresoj të mos vazhdosh të lexosh në gjuhën arabe edhe më tutje.”

Deputetja e VLEN-it, Imerlije Saliu, ka reaguar duke kërkuar një sqarim publik rreth kuptimit të kësaj deklarate. Ajo theksoi se këto fjalë mund të konsiderohen fyese ndaj besimtarëve, për të cilët arabishtja ka një rëndësi të posaçme fetare.

Në reagimin e saj, Saliu shkruan: “Për gati dy vite nuk kam reaguar ndaj kolegëve individualisht, por ka raste kur heshtja nuk është zgjidhje”. Ajo ngre pyetjen nëse bëhet fjalë për një bindje personale, një figurë retorike apo diçka tjetër.

Sipas saj, kjo deklaratë nuk mund të lihet pa shpjegim, pasi prek një çështje të ndjeshme që ka të bëjë me respektimin e lirive dhe ndjenjave fetare. Prandaj, ajo i bën thirrje Ilire Dautit të sqarojë publikisht se çfarë ka dashur të nënkuptojë me këto fjalë.