Deklarata “Mos vazhdo të lexosh në arabisht”, Ilire Dauti përballet me kritika për fjalët ndaj Afrim Gashit

Fjalët e deputetes Ilire Dauti drejtuar kryetarit të Kuvendit, Afrim Gashi, kanë shkaktuar kritika. Ajo iu drejtua atij me deklaratën: “Shpresoj të mos vazhdosh të lexosh në gjuhën arabe edhe më tutje.”

Deputetja e VLEN-it, Imerlije Saliu, reagoi duke kërkuar që Dauti të shpjegojë publikisht kuptimin e kësaj deklarate. Sipas saj, shprehja mund të konsiderohet fyese për besimtarët, për të cilët arabishtja ka një domethënie të veçantë fetare.

Saliu shkroi se për gati dy vite nuk kishte reaguar në mënyrë individuale ndaj kolegëve, por shtoi se ekzistojnë raste kur heshtja nuk përbën zgjidhje. Ajo ngriti pyetjen nëse fjalët e Dautit pasqyrojnë një bindje personale, janë përdorur si figurë retorike apo kanë një kuptim tjetër.

Duke vlerësuar se kjo çështje prek respektimin e lirive dhe ndjenjave fetare, Saliu tha se deklarata nuk mund të lihet pa një shpjegim. Për këtë arsye, ajo i kërkoi Ilire Dautit të bëjë të qartë publikisht se çfarë synonte të shprehte me ato fjalë.