Hoxha njofton hartimin e Strategjisë së Turizmit për zonën e Parkut Nacional Mali Sharr

Në shënimin e pesëvjetorit të shpalljes së Malit Sharr Park Nacional, ministri i Mjedisit Jetësor dhe Planifikimit Hapësinor, Muamet Hoxha, qëndroi për vizitë në park, ku paralajmëroi investime të reja dhe qasje sistematike për mbrojtjen e tij.

Sipas Hoxhës, në pesë vitet e fundit është ngritur një mekanizëm modern dhe funksional për administrimin e njërit nga asetet natyrore më të çmuara të vendit. Ai theksoi se kjo është arritur falë angazhimit të përbashkët të institucioneve, banorëve lokalë dhe donatorëve.

“Qëllimi ynë është i qartë: zhvillim, por në harmoni me natyrën. Nuk do të lejojmë që fitimi ta shkatërrojë natyrën”, deklaroi Hoxha, duke bërë të ditur se është duke u përgatitur edhe një Strategji e Turizmit për zonën e parkut.

Ministri shprehu përkrahje për zbatimin e plotë të kompensimeve ekosistemike, duke sqaruar se të ardhurat e grumbulluara do të rikthehen drejtpërdrejt në park. Këto mjete do të përdoren për një mjedis më të pastër, përmirësimin e infrastrukturës malore dhe rritjen e kapaciteteve të rojtarëve të parkut.

Po ashtu, gjatë këtij viti, Institucioni Publik Parku Kombëtar Mali Sharr do të përfitojë mbështetje shtesë nga ministria për avancimin e kapaciteteve në zbulimin e hershëm dhe monitorimin e zjarreve pyjore, përmes investimeve në një objekt modern.