Kosovë, Shqipëri dhe Maqedoni e Veriut, nismë e përbashkët për Parkun e Sharrit

Kosova, Shqipëria dhe Maqedonia e Veriut kanë shprehur vullnetin për të bashkëpunuar në mbrojtjen dhe zhvillimin e Parkut të Sharrit.

Gjatë Konferencës Ministeriale për Agjendën e Gjelbër për Ballkanin Perëndimor, të mbajtur në Mal të Zi, ministrja e Mjedisit dhe Planifikimit Hapësinor, Fitore Pacolli, u takua me homologët e saj nga Shqipëria dhe Maqedonia e Veriut.

Bisedimet u përqendruan te mundësia që Parku i Sharrit të shndërrohet në një park të mirëfilltë ndërkufitar, duke afruar më tej tri vendet.

Pacolli deklaroi në Facebook se nisma synon të ndërthurë ruajtjen e natyrës me zhvillimin ekonomik të komuniteteve lokale, përmes agroturizmit, turizmit të qëndrueshëm dhe promovimit të pasurive natyrore të Sharrit.

Sipas saj, me ministrat Jaupaj dhe Hoxha është rënë dakord që takimi i radhës të zhvillohet në Kosovë, ku do të vijojë diskutimi dhe do të përcaktohen më konkretisht hapat e kësaj nisme.